ఆర్థరైటిస్‌ ను తొందరగా గుర్తిస్తే నియంత్రణలోకి తెచ్చుకోవచ్చు

 మెడికవర్ ఆర్ధోపెడిక్ సర్జన్ డా.కామిశెట్టి సతీష్ కుమార్

సికింద్రాబాద్, అక్టోబర్ 12 (ప్రజామంటలు) :

మోకాళ్లు, భుజాలు, మణికట్టులు వంటి కీళ్ల నొప్పులు వృద్ధులకు మాత్రమే పరిమితం కావని, ఇప్పుడు యువతలో కూడా వేగంగా పెరుగుతున్నాయని మెడికవర్‌ హాస్పిటల్స్‌ వైద్యులు తెలిపారు. వ్యాయామం లోపం, అధిక బరువు, మానసిక ఒత్తిడి కారణంగా ఆర్థరైటిస్‌ కేసులు అధికమవుతున్నాయని చెప్పారు. ప్రస్తుతం దేశంలో సుమారు 18 కోట్ల మంది ఈ వ్యాధితో బాధపడుతున్నట్లు అంచనా. కీళ్ల వాపు, నొప్పి, గట్టిపడడం వంటి లక్షణాలు రెండు వారాలకు మించి కొనసాగితే వైద్యుడిని తప్పనిసరిగా సంప్రదించాలని మెడికవర్‌ హాస్పిటల్స్‌ ఆర్థోపెడిక్‌ సర్జన్‌ డా. కామిశెట్టి సతీష్‌కుమార్ సూచించారు. ఆదివారం ఆయన మీడియాతో మాట్లాడుతూ...తొలిదశలో గుర్తించి సరైన చికిత్స తీసుకుంటే కీళ్ల దెబ్బతినడం నివారించవచ్చని అన్నారు. తగిన బరువును కాపాడుకోవడం, ప్రతిరోజూ తేలికపాటి వ్యాయామం చేయడం, సమతుల్య ఆహారం తీసుకోవడం, స్వచ్ఛందంగా మందులు వాడకపోవడం వంటి అలవాట్లు వ్యాధి నియంత్రణలో సహాయపడతాయి అని ఆయన అన్నారు.

ఆధునిక వైద్య పద్ధతుల ద్వారా కీళ్ల పునరుద్ధరణ శస్త్రచికిత్సలు చేయించుకోవడం వల్ల రోగులు మామూలు జీవితం గడపగలరని వైద్యులు తెలిపారు. తొలిదశలో గుర్తింపు, సరైన అవగాహన, జీవనశైలి మార్పులు ఇవే ఆర్థరైటిస్‌పై గెలుపు సాధించే కీలకాంశాలని పేర్కొన్నారు. కీళ్ళు,మోకాళ్ళు,భుజాలు తదితర నొప్పులకు సొంతంగా మందులు కొనుక్కోని వాడటం చేయవద్దని, సంబంధిత వైద్యుడిని కలసి సరైన వైద్యం పొందాలని వైద్యులు సూచించారు.