దొహలో జాగృతి ఆధ్వర్యంలో బతుకమ్మ వేడుకలు

దోహా,ఖతార్ లో తెలంగాణ సంస్కృతి ఉట్టిపడేలా బతుకమ్మ వేడుకలు

దోహా సెప్టెంబర్ 27:

తెలంగాణ జాగృతి ఖతార్ శాఖ ఆధ్వర్యంలో దోహాలో శుక్రవారం రాత్రి బతుకమ్మ సంబురాలు అంగరంగ వైభవంగా నిర్వహించారు.తెలంగాణ జాగృతి అధ్యక్షురాలు కల్వకుంట్ల కవిత ఈ సంబురాలకు ముఖ్య అతిథిగా హాజరయ్యారు. తీరొక్క పూలతో బతుకమ్మలను పేర్చి పాటలు పాడుతూ బతుకమ్మ ఆడారు. చిన్నపిల్లలు, యువతులు, మహిళలు ఈ సంబురాల్లో పాల్గొన్నారు.

ఖతార్ తెలంగాణ ఆడబిడ్డలతో కలిసి ఉత్సాహంగా  కల్వకుంట్ల కవిత బతుకమ్మ  ఆడారు.

*కవిత తెలంగాణ ఆడపడుచులను ఉద్దేశించి మాట్లాడుతూ,తెలంగాణ బిడ్డలు బతుకుదెరువు కోసం బొగ్గుబాయి.. దుబాయికి పోయిండ్రు అని చెప్పుకునేటోళ్లం.
ఇక్కడికి వచ్చిన వారి కష్టాలు మాకు తెలుసు.. తల్లిదండ్రులు, కుటుంబాలను విడిచిపెట్టి ఇక్కడ క్యాంపులల్లో ఉంటూ మీకు వచ్చే జీతంలో ఎంతో కొంత మిగిల్చి ఇంటికి పంపుతరు అని అన్నారు.

మీ మనసుల ఎంత దుఃఖం ఉంటదో తెలుసు.. ఆ దుఃఖం తీరాలని ప్రయత్నం చేస్తున్నాం.. త్వరలోనే మీరంతా తెలంగాణ కు వచ్చే మంచి రోజులు రావాలని, ఇక్కడే ఉన్నా బాగుండాలని కోరుకుంటున్నాం.ఏ పండుగ వచ్చినా అక్కడ ఉన్న మీ కుటుంబానికి మీరు గుర్తుకు వస్తారు.. 
నా మనసుకు కష్టంగా, బాధగా ఉంది.. కానీ జీవితంలో కొన్ని సందర్భాలు వస్తయ్.. యుద్ధం చేయాల్సి వచ్చినప్పుడు మనోడైనా.. మందోడు అయినా న్యాయం,  ధర్మం ఎటు ఉందో చూడాలే
 మీరు మనసుల మనది ఏం పెట్టుకోకండి.. మా సంగతి ఎట్లున్నా తెలంగాణ ప్రజలు బాగుండటం, తెలంగాణ హక్కులను రక్షించడం.. తెలంగాణ ప్రజల కోసం కొట్లాడడమే ఊపిరిగా పని చేస్తాం అని హామీ ఇచ్చారు.