టీపీసీసీ వైస్ ప్రెసిడెంట్ గా డా.కోట నీలిమ నియామకం

హైదరాబాద్ కాంగ్రెస్ బలోపేతానికి నూతన ఉత్సాహం

సికింద్రాబాద్ జూన్ 10 (ప్రజామంటలు):

తెలంగాణ ప్రదేశ్ కాంగ్రెస్ కమిటీ (టీపీసీసీ)లో ప్రముఖ రచయిత, విధాన పరిశోధకురాలు డాక్టర్ కోట నీలిమను టీపీసీసీ వైస్ ప్రెసిడెంట్‌గా నియమిస్తూ పార్టీ కీలక నిర్ణయం తీసుకుంది. ఈ నియామకం ద్వారా హైదరాబాద్ నగరంలో కాంగ్రెస్ పార్టీ ఆధిపత్యాన్ని మరింతగా బలోపేతం చేయడమే లక్ష్యంగా ఉందని పరిశీలకులు భావిస్తున్నారు.ఇటీవలి వరకు టీపీసీసీ జనరల్ సెక్రటరీగా, సనత్‌నగర్ అసెంబ్లీ నియోజకవర్గ ఇన్‌చార్జ్ గా సేవలందించిన డాక్టర్ నీలిమ ప్రజాకేంద్రీకృత కార్యక్రమాలతో, పారదర్శక రాజకీయ సంభాషణకు, సామాజిక న్యాయం, సమానత్వం మరియు లౌకికతకు విశేష ప్రాధాన్యం ఇస్తూ పనిచేశారు. ప్రజల కోసం పాలనలో పాల్గొనడానికి అవకాశాలు కల్పిస్తూ, సమాజ సమస్యల పరిష్కారంలో తన ప్రత్యేక ముద్రవేశారు."న్యాయం మరియు సమానత్వం కలిగిన సమాజాన్ని నిర్మించాలనే సిద్ధాంతానికి కాంగ్రెస్ పార్టీ కట్టుబడి ఉంది. ఈ దిశగా మరింత సేవ చేసేందుకు నాకు ఈ అవకాశం లభించటం గర్వంగా ఉంది" అని డాక్టర్ నీలిమ పేర్కొన్నారు. అలాగే పార్టీ నాయకత్వానికి, సహచరులకు, తన అనుచరులకు హృదయపూర్వక కృతజ్ఞతలు తెలిపారు. "ఈ గుర్తింపు నాది మాత్రమే కాదు , తన పక్కన ఉన్న ప్రతి ఒక్కరికి చెందుతుంది. తెలంగాణ ప్రజలకు న్యాయం, గౌరవం, సత్యంపై ఆధారపడిన రాజకీయం కోసం నేను ఇంకా సమర్పితంగా పనిచేస్తాను" అని అన్నారు.