సృష్టి కేసులో ఐదు రోజుల కస్టడీకి డాక్టర్ నమ్రత

సికింద్రాబాద్ కోర్టు తీర్పు..

సికింద్రాబాద్, జూలై 31 (ప్రజామంటలు) :

సృష్టి టెస్ట్ ట్యూబ్ సెంటర్ అక్రమ సరోగసి,ఐవీఎఫ్, శిశువుల అక్రమ రవాణా తదితర కేసుల్లో  ప్రధాన నిందితురాలు డాక్టర్ నమ్రత కు పోలీసు కస్టడీ కోసం సికింద్రాబాద్ సివిల్ కోర్టు గురువారం అనుమతినిచ్చింది. సికింద్రాబాద్ సివిల్ కోర్టు పదవ అదనపు చీఫ్ మెజిస్ట్రేట్ ఐదు రోజుల పోలీస్ కస్టడీ కి అనుమతినిస్తూ తీర్పు వెల్లడించారు.

సృష్టి కేసులో ప్రధాన నిందితులుగా ఉన్న నిర్వాహకురాలు డాక్టర్ నమ్రత కు ఐదు రోజుల కస్టడీ విచారణలో కీలక విషయాలు బయటకి రానున్నాయి. సృష్టి టెస్ట్ ట్యూబ్ సెంటర్ లో  ఇటీవల జరిగిన పరిణామాల నేపథ్యంలో మరింత సమాచారాన్ని రాబట్టాలని ఉద్దేశంతో పోలీస్ కస్టడీకి విధించినట్టు పేర్కొన్నారు.ఈ కేసులో నిందితులుగా ఉన్న ఏ–2 డాక్టర్ నమ్రత కుమారుడు  జయంత్ కృష్ణ, ఏ–6 అసోం కు చెందిన మీడియేటర్ ధనశ్రీ సంతోషిలను కూడ కస్టడీకి అప్పచెప్పాలని పోలీసులు కోర్టును కోరారు. కాగా ఐదు రోజుల డాక్టర్ నమ్రత కస్డడీ విచారణలో మరెన్నో విషయాలు వెలుగు చూడనున్నాయి.

శుక్రవారం ఉదయం చంచల్ గూడ జైల్ నుంచి పోలీసులు డాక్టర్ నమ్రతను కస్డడీలోకి తీసుకొని, విచారణ జరపనున్నారు. ఇప్పటికే డాక్టర్ నమ్రతను అడిగే ప్రశ్రలకు సంబందించిన ప్రశ్నావళిని పోలీసులు సిద్దం చేసినట్లు సమాచారం. డాక్టర్ నమ్రత చెప్పే సమాచారాన్ని బట్టి ఈ కేసులో సంబందం ఉన్న మరింత మంది అరెస్ట్ లు జరిగే అవకాశం ఉందని భావిస్తున్నారు.