బుగ్గారంలో జిల్లా వైద్యాధికారుల ఆకస్మిక తనిఖీ

పరిసరాలను పరిశీలించిన జిల్లా వైద్యాధికారులు

సీజనల్ వ్యాధుల పట్ల అవగాహన

బుగ్గారం ఆగస్టు 19 (ప్రజా మంటలు):

జగిత్యాల జిల్లా బుగ్గారం మండల కేంద్రంలో జిల్లా వైద్యాధికారులు మంగళ వారం ఆకస్మిక తనిఖీ నిర్వహించారు. 
బుగ్గారం కు చెందిన ఓ వ్యక్తి ఉపాధి నిమిత్తం గత కొంత కాలంగా ధర్మపురిలో ఉంటున్నాడు. అక్కడ ఆయనకు జ్వరం సోకి తగ్గడం లేదు.  తీవ్ర జ్వరంతో బాధ పడుతున్న ఆవ్యక్తి జిల్లా ఏరియా ఆసుపత్రిలో, తర్వాత కరీంనగర్ ఆసుపత్రిలో చికిత్సలు చేయించు కుంటున్నారని తెలిసింది. 
విషయం తెలుసుకున్న జిల్లా ఉప వైద్యాధికారి ఎన్.శ్రీనివాస్ ఆధ్వర్యంలో ముందు జాగ్రత్త చర్యలు చేపట్టారు. 
జిల్లా వైద్యాధికారులు, సిబ్బంది బుగ్గారంలో కూడా మంగళ వారం ఆకస్మికంగా పర్యవేక్షించారు.  బుగ్గారంలోని పలు ప్రాంతాలలో వారు స్వయంగా వెళ్ళి పరిసరాలను పరిశీలించారు. ఇండ్లలోని వివిధ పాత్రల్లో, పాత కుండల్లో, కూలర్లలో నిలువ ఉన్న నీటిని, లార్వాలను తొలగించారు. పరిసరాలను పరిశుభ్రం చేయించి ఆయిల్ బాల్స్ వేశారు. దోమలను చంపేందుకు, తరిమి కొట్టేందుకు మందులు పిచికారి చేయించారు. గ్రామస్తులకు తగు సూచనలు, సలహాలు అందజేశారు. సీజనల్ వ్యాధుల పట్ల తీసుకోవాల్సిన జాగ్రత్తలను వివరించి అవగాహన కల్పించారు. 

వెంటనే స్పందించిన పంచాయతీ కార్యదర్శి అక్బర్ సమయ స్పూర్తితో వ్యవహరించారు.  పంచాయతీ పారిశుధ్య కార్మికులతో గ్రామంలోని పలు ప్రాంతాల్లో, బావుల్లో  బ్లీచింగ్ పౌడర్ వేశారు. దోమల సంహరణ కోసం రసాయనాలను స్ప్రే చేయించారు.

 జిల్లా ఉప వైద్యాధికారి ఎన్. శ్రీనివాస్ తో పాటు కమ్యూనిటీ వైద్యాధికారి అల్లెంకి శ్రీనివాస్, సూపర్వైజర్లు వెంకటేష్, శ్రీనివాస్,పంచాయతీ కార్యదర్శి అక్బర్, ఎం.ఎల్.హెచ్. పి. నరేష్, ఏఎన్ఎం లు శైలజ, స్వప్న,  హెల్త్ అసిస్టెంట్ శోభన్, మహేంద్ర తదితరులు పాల్గొన్నారు.