అధికారులపై కుక్కల దాడి ఘటనపై ఎస్హెచ్ఆర్సీ కి అడ్వకేట్ ఫిర్యాదు

విచారణకు స్వీకరించిన మానవ హక్కుల కమిషన్
  *ప్రతివాదిగా రాష్ర్ట ప్రభుత్వ  ముఖ్య కార్యదర్శిని చేర్చిన కమిషన్

సికింద్రాబాద్, ఆగస్ట్ 17 (ప్రజామంటలు) :

సూర్యాపేట జిల్లా తుంగతుర్తి జిల్లా పరిషత్ హైస్కూల్ ఆవరణలో  అధికారులపై వీధి కుక్కలు కరిచి గాయపరిచిన  ఘటనపై సిటీకి చెందిన అడ్వకేట్ రామారావు ఇమ్మనేని చేసిన ఫిర్యాదును తెలంగాణ రాష్ర్ట మానవ హక్కుల కమిషన్ విచారణకు స్వీకరించింది.

ఈ ఘటనలో ప్రధాన ప్రతివాదిగా రాష్ర్ట ప్రభుత్వ ముఖ్య కార్యదర్శిని పేర్కొంటూ నెంబర్ 858/ఐఎన్/2025  ద్వారా విచారణకు నిర్ణయించింది. తుంగతుర్తి జిల్లా పరిషత్ హైస్కూల్ ఆవరణలో ఇండిపెండెంట్స్ డే సెలబ్రేషన్స్ కు సంబందించి ఏర్పాట్లలో ఉన్న ఆరుగురిపై  వీధి కుక్కలు దాడి చేసి గాయపరిచాయని రామారావు తన ఫిర్యాదులో పేర్కొన్నారు. ఓ వైపు వీధికుక్కల నియంత్రణపై సుప్రీం కోర్టు జోక్యం చేసుకున్నప్పటికీ జిల్లా ప్రభుత్వ  యంత్రాంగం మాత్రం కుక్కల నియంత్రణలో నిర్లక్ష్యంగా ఉందన్నారు.

ఈ విషయమై జిల్లా కలెక్టర్ తేజస్ నందలాల్ పవార్ పై చర్యలు తీసుకోవాలని, వీధికుక్కల దాడిలో గాయపడ్డ ఆరుగురికి వైద్య సహాయం, తగిన పరిహారం అందించే విధంగా ప్రభుత్వాన్ని ఆదేశించాలని అడ్వకేట్ రామారావు తన ఫిర్యాదులో తెలంగాణ రాష్ర్ట మానవ హక్కుల కమిషన్ ను కోరారు.