గాంధీ మెడికల్ కాలేజీలో వరదనీటి కష్టాలు

సెల్లార్ లో నిలిచిపోయిన డ్రైనేజీ, వర్షపు నీరు
  రంగంలోకి హైడ్రా సిబ్బంది
  ఆందోళనలో వైద్య విద్యార్థులు, సిబ్బంది

సికింద్రాబాద్, సెప్టెంబర్ 20 (ప్రజామంటలు):

సికింద్రాబాద్ గాంధీ మెడికల్ కాలేజీలో డ్రైనేజీతో పాటు వర్షపు నీరు బెడద పెరిగిపోయింది. కాలేజీ భవనంలో కాలం చెల్లిన డ్రైనేజీ కారణంగా కాలేజీ భవనంలోని డ్రైనేజీ నీరు బయటకు పోలేక సెల్లార్ లోనే  జామ్ అవుతోంది. కాలేజీ సెల్లార్ లోని డ్రైనేజీ పైపుల ఎత్తు కన్నా పద్మారావునగర్ వైపు కు వెళ్ళే డ్రైనేజీ పైప్ లైన్ లు ఎత్తు ఎక్కువగా ఉండటంతో డ్రైనేజీ నీరు బయటకు సక్రమంగా వెళ్ళడం లేదని సిబ్బంది వాపోతున్నారు. 

కాగా ఇటీవల వరసగా కురిసిన వర్షాలతో మెడికల్ కాలేజీ బిల్డింగ్ పైన కురిసిన వర్షపు నీరంతా సెల్లార్ లోకి వెళ్ళడంతో సెల్లార్ నీట మునిగింది. లిఫ్టుల కింది భాగంలోకి కూడ నీరు వెళ్ళడంతో వెంటనే లిఫ్టులను మూసివేశారు. అలాగే సెల్లార్ లోకి ఎవరు వెళ్ళకుండా దారిని తాత్కలికంగా మూసివేశారు. దాంతో వాహనాల పార్కింగ్ ఇబ్బందిగా మారింది. సెల్లార్ లో నిలిచిన నీటి ద్వారా దురదృష్టవశాత్తు కరెంట్ సరఫరా జరిగితే పెద్ద ప్రమాదం సంభవిస్తుందని సిబ్బంది, వైద్య విద్యార్థులు భయాందోళనలు వ్యక్తం చేస్తున్నారు. సెల్లార్ లోని నీటిని బయటకు పంపింగ్ చేసేందుకు హైడ్రా సిబ్బంది కాలేజీకి చేరుకొని పనులు నిర్వహించారు.

ఈ విషయమై మెడికల్ కాలేజీ ప్రిన్సిపాల్ డా.ఇందిరా ను ప్రశ్నించగా, ఇప్పటికే తాము కాలేజీ లోని డ్రనేజీ సమస్య గురించి ప్రభుత్వానికి మూడు సార్లు ప్రతిపాదనలు పంపామని తెలిపారు. ప్రభుత్వం నిధులు మంజూరీ చేస్తే, టీజీఎంఎస్ఐడీసీ సంస్థ టెండర్లు పిలిచి కొత్తగా పైప్ లైన్ పనులు చేయాల్సి ఉంటుందన్నారు. ప్రభుత్వం ఇప్పటికైన గాంధీ మెడికల్ కాలేజీ డ్రైనేజీ వ్యవస్థపై దృష్టి సారించి, నిధులు మంజూరీ చేసి, కొత్తగా డ్రైనేజీ పనులను ప్రారంభించాలని వైద్య విద్యార్థులు, సిబ్బంది కోరుతున్నారు.