భక్తి శ్రద్ధలతో ముత్తారం గ్రామంలో గణనాథ విగ్రహ ప్రతిష్టాపన

భీమదేవరపల్లి, ఆగస్టు 27 (ప్రజామంటలు):

భీమదేవరపల్లి మండలంలోని ముత్తారం గ్రామం ఆధ్యాత్మిక ఉత్సవ వాతావరణంతో కళకళలాడింది. బుధవారం మధ్యాహ్నం గణనాథ స్వామి విగ్రహ ప్రతిష్టాపన కార్యక్రమం ఘనంగా జరిగింది. వేద మంత్రోచ్ఛారణల మధ్య పురోహితులు అంజయ్య శాస్త్రి హోమాలు, ప్రత్యేక పూజలు నిర్వహించి గణనాథుడిని ఆవాహన చేశారు. ఈ సందర్భంగా గ్రామానికి చెందిన ఊరడి భారతి, జైపాల్ రెడ్డి దంపతులు, వారి కుమారుడు శ్రీనిధి క్రాంతి కిరణ్ రెడ్డి దంపతులు, అంజలా - చైతన్య విగ్రహ ప్రతిష్టాపనలో పాల్గొని ప్రత్యేక పూజలు చేశారు.

విగ్రహాన్ని జైపాల్ రెడ్డి స్వయంగా దానం చేయగా, ఆలయంలో వినియోగం కోసం రూ.40,000 విలువైన జనరేటర్ ను కూడా విరాళంగా సమకూర్చారు. ప్రతిష్టాపన అనంతరం స్వామివారి విగ్రహానికి గ్రామస్థులు పూలమాలలు సమర్పించి, పాలాభిషేకం చేసి ఆశీర్వాదాలు పొందారు. భక్తులు భక్తి శ్రద్ధలతో గణనాథునికి నమస్కరిస్తూ సాంప్రదాయ రీతిలో వందనాలు సమర్పించారు. ఈ సందర్భంగా జరిగిన మహా అన్నదానంలో వందలాది మంది భక్తులు, గ్రామ ప్రజలు పాల్గొని అన్నప్రసాదాన్ని స్వీకరించారు. కార్యక్రమం విజయవంతం కావడంలో గ్రామ దేవతల గడ్డ – లంబోదరుని అడ్డ టీం సభ్యులు చురుకైన పాత్ర పోషించారు. గ్రామంలో గణనాథుడి ప్రతిష్టాపన జరగడం పట్ల భక్తులు హర్షం వ్యక్తం చేస్తూ, ఇలాంటి ఆధ్యాత్మిక కార్యక్రమాలు తరతరాలకు స్ఫూర్తినిస్తాయని పేర్కొన్నారు.