వరి ధాన్యం కొనుగోలు కేంద్రానికి భూమి ఇవ్వండి

- మంత్రి అడ్లూరి లక్ష్మణ్ కుమార్ కు "విడిసి విజ్ఞప్తి"

తహసీల్దార్ కు విజ్ఞాపన పత్రం అందజేసిన విడిసి, రైతులు

బుగ్గారం ఆగస్టు 26 (ప్రజా మంటలు):

బుగ్గారం మండల కేంద్రంలో వరిధాన్యం కొనుగోలు కేంద్రం కోసం 25 ఎకరాలకు తగ్గకుండా ప్రభుత్వ భూమి కేటాయించి చట్టబద్ధంగా అప్పగించాలని రాష్ట్ర మంత్రి అడ్లూరి లక్ష్మణ్ కుమార్ కు గ్రామ అభివృద్ది కమిటీ అధ్యక్షులు నక్క చంద్రమౌళి అధ్వర్యంలో రైతులు విజ్ఞప్తి చేశారు. తెలంగాణ రాష్ట్ర మంత్రి వర్యులు అడ్లూరి లక్ష్మణ్ కుమార్ కు వాట్సాప్ సోషల్ మీడియా ద్వారా విజ్ఞాపన పత్రం పంపించడం జరిగిందని విడిసి వ్యవస్థాపక అధ్యక్షులు చుక్క గంగారెడ్డి తెలిపారు. 
మంగళ వారం స్థానిక తహసీల్దార్ కు కూడా రైతులతో కలిసి విడిసి ద్వారా విజ్ఞాపన పత్రం అందజేశారు.
ఈ సందర్భంగా చుక్క గంగారెడ్డి మాట్లాడుతూ
బుగ్గారంలో సరైన వరి ధాన్యం కొనుగోలు కేంద్రం లేక రైతులు అష్టకష్టాలు పడుతున్నారని వివరించారు. 
ఆరు గాలం శ్రమించి పండించిన ధాన్యం అమ్మడానికి సరైన స్థలం లేక పోవడంతో ఎండలకు, వానలకు, వడగళ్ల వర్షాలకు, ధాన్యం ఆరబెట్టుటకు, తూకం వేసిన ధ్యానం బస్తాలను రవాణా చేయుటకు రైతులు ప్రతీ పంట కాలంలో తీరని కష్టాల పాలు -  నష్టాల పాలు అవుతున్నారని ఆవేదన వ్యక్తం చేశారు. గ్రామ సమీపాన గల ఊరగట్టు ప్రాంతంలో కనీసం 25 ఎకరాలకు తగ్గకుండా ప్రభుత్వ భూమిని రైతుల కోసం కేటాయించి విడిసి కి అప్పగించాలని కోరారు. ఈ పంట రాకముందే ప్రభుత్వ ఆర్థిక సాయంతో అట్టి భూమిని చదును చేపిస్తే వరి ధాన్యం కొనుగోలు కేంద్రం బాగుంటుందని ఆయన అభిప్రాయం వ్యక్తం చేశారు. మంత్రి అడ్లూరి లక్ష్మణ్ కుమార్ పేరును ఈ ప్రాంత రైతులు చిరకాలం గుర్తుంచు కుంటారని ఆయన పేర్కొన్నారు. స్థానిక నాయకులు, ప్రముఖులు, గ్రామస్తులు రాజకీయాలకు అతీతంగా గ్రామాభివృద్ధి కమిటీకి సహకరించి రైతుల కష్టాలు తీర్చడానికి దోహద పడాలని ఆయన కోరారు.
ఈ కార్యక్రమంలో విడిసి వ్యవస్థాపక అధ్యక్షులు చుక్క గంగారెడ్డి, కోర్ కమిటీ వైస్ చైర్మన్ పెద్దనవేని రాగన్న, అధ్యక్షులు నక్క చంద్రమౌళి, సహాయ కార్యదర్శి కళ్లెం నగేష్, రైతులు మసర్తి రాజిరెడ్డి, మాదాసు చంద్రయ్య, పరుమాల చిలుకయ్య, పొలంపల్లి మల్లేశం, కేతి చిలుకయ్య, గట్టు ప్రవీణ్, ఏలేశ్వరం గౌరి శంకర్ తదితరులు పాల్గొన్నారు.