30 పడకల ఆసుపత్రిలో 3 ఏళ్లుగా పనిచేయని ఎక్స్ రే మిషన్

భీమదేవరపల్లి, ఆగస్టు 28, ప్రజామంటలు:

 మండలంలోని వంగర గ్రామంలో 30 పడకల ప్రభుత్వ వైద్య ఆరోగ్య కేంద్రం శిథిలావస్థలో ఉంది. ఈ ఆసుపత్రిలోని ఎక్స్ రే యంత్రం గత మూడు సంవత్సరాలుగా పనిచేయడం లేదు. ఫలితంగా పేద, మధ్యతరగతి కుటుంబాలు వైద్య సేవల కోసం 20 కిలోమీటర్ల దూరం ప్రయాణించి ప్రైవేట్ ఆసుపత్రులను ఆశ్రయించాల్సి వస్తోంది. రోజువారీ కూలి పనులు చేసే రోగులకు ఇది మరింత భారంగా మారి, ఆర్థికపరమైన ఇబ్బందులను తెచ్చిపెడుతోంది.

*స్థానిక ప్రజల వేదన*

చిన్నపాటి ప్రమాదాలు జరిగినా కూడా వెంటనే ఎక్స్ రే తీసుకోవలసిన పరిస్థితి వస్తుంది. కాని ప్రభుత్వాసుపత్రిలో అందుబాటులో లేకపోవడంతో ప్రైవేట్ ఆసుపత్రులకే వెళ్లాల్సి వస్తోందని ఆవేదన వ్యక్తం చేశారు. ప్రైవేట్ హాస్పిటల్లో ఒక్కో ఎక్స్ రే 500 -700 రూ.ల వరకు ఖర్చు అవుతోందని అన్నారు. అదనంగా ప్రయాణ ఖర్చులు తోడవడంతో పేద కుటుంబాలపై భారం పడుతోందని అంటున్నారు. ప్రజా ప్రతినిధులు, ప్రభుత్వ అధికారులు సమస్య పరిష్కరించమని విజ్ఞప్తి చేసినప్పటికీ ఇప్పటివరకు చర్యలు కనిపించడంలేదు.

*అధికారుల స్పందన*

జిల్లా వైద్య ఆరోగ్య అధికారి అప్పయ్య మాట్లాడుతూ,
"వంగర ప్రైమరీ హెల్త్ సెంటర్‌ శిథిలావస్థలో ఉంది. ఈ కారణంగానే ఎక్స్ రే మిషన్ కూడా పనిచేయడం లేదు. కొత్త ఆసుపత్రి భవనాన్ని ఏర్పాటు చేసి, ఆధునిక ఎక్స్ రే యంత్రాన్ని ఏర్పాటు చేయాలని జిల్లా కలెక్టర్‌కి ప్రతిపాదనలు పంపించామని తెలిపారు.