పండుగను సంబురంగా, శాంతియుతంగా జరుపుకోవాలి. - నార్త్ జోన్ డీసీపీ రష్మీ పెరుమాళ్

గణేష్ వేడుకలు–2025 ఏర్పాట్లపై శాంతి కమిటీతో సమన్వయ సమావేశం

సికింద్రాబాద్, ఆగస్ట్ 25 (ప్రజామంటలు) :

 రాబోయే గణేష్ ఉత్సవం–2025 ను ప్రజలు సంబరంగా, శాంతియుతంగా జరుపుకోవాలని, వేడుకలు సాఫీగా నిర్వహణకు పోలీస్ అధికారులతో సహకరించాలని నార్త్ జోన్ డీసీపీ రష్మి పెరుమాళ్ కోరారు. సోమవారం ఉత్తర మండల డీసీపీ కార్యాలయంలో సమన్వయ సమావేశం జరిగింది. ఈ సమావేశానికి అదనపు డీసీపీ , గోపాలపురం, మహాంకాళి,బేగంపేట,తిరుమల్ గిరి డివిజన్ల ఏసీపీలు, ఉత్తర మండలంలోని ఎస్హెచ్ఓలు, కంట్రోల్ రూమ్ ఇన్స్పెక్టర్లతో పాటు 70 మందికి పైగా శాంతికమిటీ సభ్యులు పాల్గొన్నారు.

ఉత్సవాల విస్రృతి, ప్రాధాన్యత దృష్ట్యా, గత అనుభవాలను సమీక్షిస్తూ, ప్రజా భద్రత, సాఫీగా ఉత్సవాలు, శాంతియుత నిమజ్జన ప్రదర్శనల కోసం సమగ్ర ఏర్పాట్లను ఖరారు చేశారు.  సమావేశంలో పలు అంశాలపై చర్చించారు. పర్యావరణ హిత మట్టి విగ్రహాల ఏర్పాటుకు ప్రోత్సహించాలన్నారు. అన్ని గణేశ్ మండపాలు ఆన్ లైన్ లో రిజిస్ర్టేషన్ తప్పనిసరిగా చేయించుకోవాలన్నారు. మండపాల్లో స్వచ్చంద కార్మికుల వివరాలు, గుర్తింపు పత్రాలు, బ్యాక్ గ్రౌండ్ దృవీకరణ, అగ్రిమాపక, విద్యుత్ భద్రత చర్యలు, మండపాల వద్ద పేలుడు పదార్ధాలు, జ్వలించే పదార్దాల వాడకంపై నిషేదం, రోడ్ల అక్రమణలు, ప్రజాప్రదేశాల్లో విగ్రహాల ఏర్పాటు చేయకూడదనే అంశాలపై పోలీస్ సిబ్బంది అప్రమత్తంగా ఉండి, తనిఖీలు చేయాలన్నారు.

విగ్రహాల పరిమితులు, ట్రాఫిక్ మళ్ళింపులు,చిన్న, చిన్న చెరువుల్లో సురక్షిత నిమజ్జనంపై అవగాహన కల్పించాలన్నారు. 24 గంటల పాటు స్వచ్చంద కార్మికుల డ్యూటీ, సీసీ కెమెరాలు, ఫైర్ ఎక్సింటిగైషర్ల ఏర్పాటు, పరిశుభ్రత పాటించడంపై దృష్టి పెట్టాలన్నారు.