ఎస్సారెస్పీ కెనాల్ నీటిని సకాలంలో విడుదల చేసి ఆయకట్టు రైతాంగాన్ని ఆదుకోవాలి..... తెలంగాణ రైతు ఐక్యవేదిక రాష్ట్ర అధ్యక్షుడు శేర్ నర్సారెడ్డి 

మెట్పల్లి ఆగస్టు 1 (ప్రజా మంటలు)

 శ్రీరాంసాగర్ ప్రాజెక్టు ద్వారా కెనాల్ నీటిని సకాలంలో విడుదల చేసి ఆయకట్టు రైతాంగాన్ని ఆదుకోవాలని తెలంగాణ రైతు ఐక్యవేదిక రాష్ట్ర అధ్యక్షుడు శేర్ నర్సారెడ్డి, చెరుకు రైతు ఉత్పత్తిదారుల సంఘం అధ్యక్షుడు మామిడి నారాయణరెడ్డి, గురిజెల రాజారెడ్డిలు ఎస్సారెస్పీ అధికారులకు విజ్ఞప్తి చేశారు.

మెట్ పల్లిలో శుక్రవారంనాడు విలేకరులతో వారు మాట్లాడుతూ ఎస్సారెస్పీ కెనాల్ కింద ఆయకట్టు రైతులు వానాకాలం వరి పంట సాగు నిమిత్తం వరి నార్లు పోసి 20 రోజుల నుండి దాదాపుగా 35 రోజులు కాల వ్యవధి కావస్తున్నప్పటికీ కెనాల్ నీటిని విడుదల చేయకపోవడంతో వరి నాట్లు వేయలేక రైతులు తీవ్ర ఆందోళన చెందుతూ వరి నార్లు ముదిరిపోతాయనే కారణంతో మానసిక ఆవేదనకు గురవుతున్నారనీ పేర్కొన్నారు.

వరి నాట్లను సకాలంలో వేయకపోతే వరి పంట దిగుబడి తగ్గిపోయే అవకాశం ఉందని తెలిపారు. వానకాలం సీజన్ వ్యవసాయ సాగు పంటలకు రైతుల అవసరాలను దృష్టిలో ఉంచుకొని పొలాల్లో వరి నాట్లు వేసుకునేందుకు ఎస్సారెస్పీ కెనాల్ నీటిని సకాలంలో విడుదల చేసి ఆయకట్టు రైతాంగాన్ని ఆదుకోవాలని తెలంగాణ రైతు ఐక్యవేదిక రాష్ట్ర అధ్యక్షుడు శేర్ నర్సారెడ్డి, చెరుకు రైతు ఉత్పత్తిదారుల సంఘం అధ్యక్షుడు మామిడి నారాయణరెడ్డి, గురిజెల రాజారెడ్డిలు అధికారులకు విజ్ఞప్తి చేశారు. ఈ సమావేశంలో రైతు నాయకులు కొత్తపల్లి రాజారెడ్డి,ఇట్టెడి శంకర్ రెడ్డి,వొడ్డెం వెంకటస్వామి,  తదితరులు పాల్గొన్నారు.