ప్రజలు కష్టాల్లో ఉంటే చేయాల్సింది సాయం...రాజకీయం కాదు..

బీఆర్ఎస్ నేతలపై కాంగ్రెస్ ఇంచార్జీ డా.కోట నీలిమ విమర్శ

సికింద్రాబాద్, సెప్టెంబర్ 19 (ప్రజామంటలు) :

బల్కంపేట నుంచి బేగంపేట్ వెళ్లే అండర్ పాస్ బ్రిడ్జి కింద వరదల్లో చిక్కుకొని ఓ యువకుడు చనిపోగా, పీసీసీ ఉపాధ్యక్షురాలు, సనత్ నగర్ నియోజకవర్గ కాంగ్రెస్ పార్టీ ఇన్చార్జి కోట నీలిమ స్పందించారు. ఈమేరకు శుక్రవారం ఆమె ట్రాఫిక్ పోలీస్ అధికారులు,స్థానిక నాయకులతో కలసి అండర్ పాస్ బ్రిడ్జి వద్ద పర్యటించారు.

 హైదరాబాద్ మహా నగరంలో వరద నీరు నిలువ కాకుండా ఎప్పటికప్పుడు క్లియర్ చేసేలా కాంగ్రెస్ ప్రభుత్వం హైడ్రా అనే వ్యవస్థను ఏర్పాటు చేసిందన్నారు. అందులో భాగంగానే  బల్కంపేట పరిధిలోని అండర్ పాస్ బ్రిడ్జి కింద వచ్చి చేరుతున్న వరద నీరును సైతం హైడ్రా మోటార్లు పెట్టి తొలగిస్తోందన్నారు. భారీ వర్షాల నేపథ్యంలో హైడ్రా అధికారులు రాత్రింబవళ్ళు పని చేస్తున్నారని పేర్కొన్నారు. ఐతే వరదల్లో ఇటీవల యువకుడు మరణించడం బాధాకరం అన్నారు.  ఈ సందర్భంగా ఆమె మాట్లాడుతూ.. బీఆర్ఎస్ నాయకులకు చురకలు అంటించారు. ఓ వైపు ప్రజలు వరదలతో బాధపడుతుంటే బీఆర్ఎస్ నాయకులు పనికి మాలిన రాజకీయాలు చేస్తున్నారని విమర్శించారు. ప్రజలు కష్టాల్లో ఉంటే చేయాల్సింది సాయం కానీ రాజకీయం కాదన్నారు.

కాంగ్రెస్ ప్రభుత్వం వచ్చాక హైడ్రా అనే వ్యవస్థను ఏర్పాటు చేసి వరదలను నియంత్రించిందన్నారు. వరదల్లో చిక్కుకున్న జనాన్ని కాపాడటం కోసం వెళ్తే అక్కడ కూడా వారి కార్యకర్తలను ఉసిగొల్పి పనులకు అడ్డం పడటం సరికాదన్నారు. బీఆర్ఎస్ నేతల రాజకీయాల వల్ల ప్రజలకు పూర్తి స్థాయిలో సేవలందించడంలో అడ్డంకులు ఎదురవుతున్నాయని పేర్కొన్నారు. ఇకనైనా ప్రతిపక్ష పార్టీలు రాజకీయాలు మానుకొని కాంగ్రెస్ ప్రభుత్వం చేపడుతున్న అభివృద్ధి కార్యక్రమాలకు, అధికారులకు సహకరించాలని విజ్ఞప్తి చేశారు. వరదల్లో మరణించిన యువకుడి కుటుంబానికి ప్రభుత్వం అండగా ఉంటుందన్నారు.