భక్తి శ్రద్ధలతో ఏకాదశి వేడుకలు -  ధర్మపురిలో భక్తుల దైవ దర్శనాలు

( రామ కిష్టయ్య సంగన భట్ల)
ధర్మపురి సెప్టెంబర్ 03:
సుప్రసిద్ధ గోదావరీ తీరస్థ ప్రాచీన పుణ్య తీర్ధ మైన ధర్మపురి క్షేత్రంలో, భాద్రపద శుద్ధ ఏకాదశి పర్వ దిన వేడుకలను బుధ
వారం సాంప్రదాయ రీతిలో వైభవంగా జరుపుకున్నారు. దీనినే వామన ఏకాదశి అంటారు. ఆషాఢ శుద్ధ ఏకాదశినాడు విష్ణువు నిద్రకు ఉపక్రమించి, బాద్రపద ఏకాదశికి రెండు నెలలు అయిన సందర్భంగా పక్కకు ఒత్తిగిల్లు తాడు. ఆ ఒత్తిలడం ఎడమ నుండి కుడికి కనుక దీనిని "పర్శ్వ పరివర్తినేకా దశి" అని కూడా అంటారు.

ఏకాదశి పర్వదిన సందర్భంగా సుదూర ప్రాంతాలనుండి, ఆర్టీసీ బస్సులలో, ప్రైవేటు వాహనాలలో బుధ
వారం ఉదయాత్పూర్వం నుండి శ్రమకోర్చి ఏతెంచిన భక్తులు, గోదావరి నదిలో మంగళ స్నానాలు ఆచరించి, గోదావరి మాతను పూజించి, మొక్కులు చెల్లించు కున్నారు.

అనంతరం దైవ దర్శనార్ధం దేవాలయాలకు తరలి వెళ్ళారు. దేవస్థానం ఈఓ శ్రీనివాస్, జక్కు రవీందర్ నేతృత్వం లోని ధర్మ కర్తల,  సూపరింటెండెంట్ కిరణ్ ఆధ్వర్యంలో ఆస్థాన వేద పండితులు బొజ్జా రమేశ శర్మ, ఆర్చక పురోహి తులు బొజ్జా సంతోష శర్మ, సంపత్ కుమార శర్మ, పాలెపు ప్రవీణ్ శర్మ, రాజగోపాల శర్మ, దేవాలయాల అర్చకులు విధివిధాన వేదోక్త, పంచోపనిషత్ యుక్త ప్రత్యేక పర్వ దిన పూజలు, నిత్య కళ్యాణాదులను నిర్వహించారు. 

 ఏకాదశి తిథి పర్వదినాన వివిధ ఆలయాలలో క్షీరాభిషేకాది కార్యక్రమాలను కన్నుల పండువగా నిర్వహించారు. అశేష భక్తులు ఏకాదశి సందర్భ ప్రత్యేక పూజలలలో పాల్గొన్నారు. బుధవార సహిత ఏకాదశి పర్వదిన సందర్భంలో క్షేత్ర ముత్తయిదువులు ప్రత్యేక వ్రతాలను ఆచరించారు.