వారసిగూడా లో అటెన్షన్ డైవర్షన్ నిందితుడి అరెస్ట్

సికింద్రాబాద్, ఆగస్ట్ 31 (ప్రజామంటలు):

ఈస్ట్‌ జోన్‌ పరిధిలోని  వారసిగూడా పోలీసులు ఆటెన్షన్‌ డైవర్షన్‌ నిందితుడిని అరెస్ట్‌ చేశారు. నిందితుడి వద్ద నుంచి రెండు పెద్ద బుచర్‌ కత్తులు, ఒక నీలిరంగు చొక్కా, ఒక వైర్‌లెస్‌ సెట్‌, ఒక వీవో మొబైల్‌, రూ.4,300 నగదు, బైక్‌ ను స్వాధీనం చేసుకున్నారు.

పోలీసులు తెలిపిన వివరాలు..ఎల్ఎన్ నగర్ కు చెందిన మటన్ షాప్ వర్కర్ గౌస్ ఖాన్ అలియాస్ ఆఫ్తాబ్ ఖాన్ (33) ఆగస్ట్ 26న సాయంత్రం మాస్క్, హెల్మెట్ ధరించి చేతిలో వైర్లెస్ తో జీహెచ్ఎంసీ విజిలెన్స్ అధికారిగా నటిస్తూ రాంనగర్ లోని వైఎస్ఆర్ పార్కు సమీపంలోని ఓ మటన్ షాప్ లోకి వెళ్ళాడు. అక్కడ కార్మికుడిని బెదిరించి రెండు బుచర్ కత్తులు, రూ 4,300 నగదును దొంగిలించాడు. బాధితుడు ముషీరాబాద్ కు చెందిన బాధితుడు ఇబ్రహీం ఫిర్యాదు మేరకు వారాసిగూడ పోలీసులు కేసు నమోదు చేసి, దర్యాప్తు చేశారు. ఈ క్రమంలో కమ్యూనిటీ సీసీటీవీ ఫుటేజీ ఆధారంగా పోలీసులు నిందితుడిని గుర్తించారు.

ఆగస్ట్ 31న వారాసిగూడ ఎక్స్ రోడ్డు వద్ద నిందితుడిని పట్టుకున్నారు. పోలీసుల విచారణలో నిందితుడు నేరాన్ని ఒప్పుకున్నట్లు పోలీసులు తెలిపారు. ఈస్ట్ జోన్ డీసీపీ బి.బాలస్వామి, అడిషనల్ డీసీపీ నర్సయ్య, ఏసీపీ శశాంక్ రెడ్డి పర్యవేక్షణలో వారాసిగూడ ఇన్స్పెక్టర్ మధుసూదన్ రెడ్డి, డిటెక్టివ్ ఇన్ స్పెక్టర్ పురేందర్ రెడ్డి, ఎస్ఐలు గోపాల్, సుధాకర్,సిబ్బంది కేసును చేధించారు. వీరిని పోలీస్ ఉన్నతాధికారులు అభినందించారు.