తెలంగాణ ఆడపడుచులతో అందగత్తెల కాళ్ళు కడిగిస్తారా...?

తెలంగాణ ఆత్మగౌరవాన్ని తాకట్టు పెట్టారు.

సికింద్రాబాద్ మే15 (ప్రజామంటలు):

విశ్వసుందరి పోటీల నేపథ్యంలో వరంగల్ రామప్ప దేవాలయానికి వచ్చిన విశ్వసుందరిల పాదాలను కాంగ్రెస్ ప్రభుత్వం తెలంగాణ మహిళలతో కడిగించి అవమానించారని బి అర్ ఎస్ మాజీ ఎమ్మెల్యే గొంగిడి సునీత, బి ఆర్ ఎస్ కార్పొరేటర్లు గురువారం తెలంగాణ మహిళా కమిషన్ చైర్ పర్సన్ కు ఫిర్యాదు చేశారు. బిఆర్ఎస్ కార్పొరేటర్లతో కలిసి మహిళా కమిషన్ చైర్ పర్సన్ నేరేళ్ళ శారదకు ఫిర్యాదు చేసి, వారిపై చర్యలు తీసుకోవాలని కోరారు. తెలంగాణ ఆడపడుచులను అవమానించే విధంగా కాంగ్రెస్ ప్రభుత్వం చేసిన చర్యలను ఖండించారు. కాంగ్రెస్ ప్రభుత్వానికి గొప్ప పేరు రావాలంటే వరంగల్ జిల్లాకు చెందిన ఇద్దరు కాంగ్రెస్ మహిళా మంత్రుల చేత విశ్వసుందరుల కాళ్ళను కడిగించాల్సిందని అన్నారు. ఇలాంటి చర్యల మూలంగా తెలంగాణ ప్రతిష్ట దెబ్బతింటుందని అన్నారు. విశ్వసుందరి పోటీదారులు రామప్ప దేవాలయం వద్ద బతుకమ్మను అగౌరవపరిచే విధంగా కాళ్లకు పాదరక్షలు ధరించి బతుకమ్మ ఆడించడం ఎంతవరకు సమంజసమని ప్రశ్నించారు. తెలంగాణ ఆడపడుచుల ఆత్మ గౌరవాన్ని తాకట్టుపెట్టే విధంగా కాంగ్రెస్ ప్రభుత్వం వ్యవహరిస్తున్న తీరుపై ఆమె మండిపడ్డారు.  తెలంగాణ మహిళల పట్ల చిన్నచూపు, వివక్ష వైఖరి ప్రదర్శించడం సరికాదన్నారు.బీఆర్ఎస్ సీనియర్ నాయకులు పాల్వాయి స్రవంతి,కార్పొరేటర్లు సామల హేమ,కంది శైలజ, రాసూరి సునీత తో పాటు అర్పిత, డా.సత్య,అరుణ, రమాదేవి పాల్గొన్నారు.