ఉద్యమకారులకు ఇచ్చిన హామీలను అమలు పర్చాలి

సికింద్రాబాద్, ఏప్రిల్ 21 ( ప్రజామంటలు):

 కాంగ్రెస్ ప్రభుత్వం తెలంగాణ ఉద్యమకారులకు ఇచ్చిన హామీలను వెంటనే అమలు చేయాలని తెలంగాణ ఉద్యమకారుల ఫోరం చైర్మన్ చీమ శ్రీనివాస్, పట్లోళ్ళ సురేందర్ రెడ్డిలు విజ్ఞప్తి చేశారు. సీతాఫల్మండి జీహెచ్ఎమ్సీ హాల్లో జరిగిన తెలంగాణ ఉద్యమకారుల ప్లీనరీ సమావేశానికి ఎమ్మెల్సీలు కోదండరాం, అద్దంకిదయాకర్, ఎల్.రమణ, నాయకులు వీ.హనుమంతరావు,తాడురి శ్రీనివాస్ లు హాజరయ్యారు.

ఈ సందర్భంగా జయశంకర్ చిత్రపటానికి పూలమాలవేసి నివాళులు అర్పించారు. తెలంగాణ ఉద్యమ సమయంలో పోరాడిన ఉద్యమకారులను గుర్తించి కాంగ్రెస్ ప్రభుత్వం ఇచ్చిన హామీలైన 250 గజాల ఇళ్ల స్థలంతో పాటు పెన్షన్లను ఇవ్వాలని డిమాండ్ చేశారు. ఉద్యమకారుల కోసం ప్రత్యేకంగా ఒక కమిటీని ఏర్పాటు చేసి గుర్తింపు కార్డులు జారీ చేయాలని అన్నారు.

ఉద్యమకారులకు సంక్షేమ బోర్డు తో పాటు అన్ని సంక్షేమ పథకాలలో 20 శాతం, విద్యార్థి ఉద్యమకారులకు జర్నలిస్టులకు న్యాయం చేయాల్సిన బాధ్యత కాంగ్రెస్ ప్రభుత్వంపై ఉందని అన్నారు. ఈ సందర్భంగా ఎమ్మెల్సీ కోదండరాం మాట్లాడుతూ.. పోరాడి సాధించుకున్న తెలంగాణను అభివృద్ధి చేసుకోవాల్సిన బాధ్యత కూడా ఉద్యమకారులపై ఉందని అన్నారు.

ఉద్యమకారులకు వచ్చిన హామీలను కాంగ్రెస్ ప్రభుత్వం నెరవేర్చాలని ఆయన కోరారు. ఉద్యమకారులకు ఇచ్చిన హామీలతో పాటు వారికి న్యాయం చేయాల్సిన బాధ్యత కాంగ్రెస్ ప్రభుత్వంపై ఉందని పలువురు వక్తలు అన్నారు. కార్పొరేటర్లు డాక్టర్ సామల హేమ,లింగాని ప్రసన్న లక్ష్మీ,నాయకులు మల్లూరి అనిల్,గగన్ కుమార్,జానకి రెడ్డి,దయానంద్, పుట్నాల కృష్ణ,జగన్,వీరస్వామి పాల్గొన్నారు.