135వ అంబేద్కర్ జయంతి వేడుకలు తెలంగాణ భవన్‌లో ఘనంగా నిర్వహణ

హైదరాబాద్ ఏప్రిల్ 14:

భారత రాజ్యాంగ నిర్మాత, సామాజిక న్యాయాన్ని ప్రాతినిధ్యం వహించిన మహానేత డాక్టర్ బీఆర్ అంబేద్కర్  135వ జయంతి సందర్భంగా తెలంగాణ భవన్‌లో ప్రత్యేక వేడుకలు నిర్వహించారు.

ఈ కార్యక్రమానికి ముఖ్య అతిథిగా భారత రాష్ట్ర సమితి వర్కింగ్ ప్రెసిడెంట్ కేటీ రామారావు హాజరయ్యారు. ఆయనతో పాటు మాజీ మంత్రి కొప్పుల ఈశ్వర్, మండలి పార్టీ నాయకులు మధుసూదనా చారి, తెలంగాణ తొలి ఆర్థిక సంఘం మాజీ చైర్మన్ జి. రాజేశం గౌడ్, వాక్ బోర్డ్ మాజీ చైర్మన్ మీర్అ యూసఫ్, కరీంనగర్ జిల్లా పరిషత్ మాజీ చైర్ పర్సన్ శ్రీమతి తులా ఉమా పాల్గొన్నారు.

వేడుకలలో అంబేద్కర్ సేవలను స్మరించుకుంటూ, ఆయన చూపిన మార్గంలో నడిచేందుకు ప్రతిజ్ఞలు చేశారు. సమాజంలో సమానత్వం, బహుళత్వం, న్యాయం వంటి విలువలు నిలబెట్టేందుకు ప్రతి ఒక్కరు కృషి చేయాలని ఈ సందర్భంగా నాయకులు పిలుపునిచ్చారు.

అనంతరం తెలంగాణ భవన్ నుండి సచివాలయం వద్ద ఉన్న 125 అడుగుల డాక్టర్ బీఆర్ అంబేద్కర్ విగ్రహానికి వెళ్లి, నేతలు పుష్పాంజలి ఘటించారు. విగ్రహానికి ముందు నివాళులు అర్పిస్తూ అంబేద్కర్  విశిష్టతను గుర్తుచేశారు.

ఈ కార్యక్రమం అంబేద్కర్ ఆలోచనలు, ఆశయాలను ప్రతిబింబించడంతో పాటు, సమాజంలో మార్పు కోసం ఆయన చూపిన మార్గాన్ని నేటి తరానికి తెలియజేయడం లక్ష్యంగా సాగింది. ప్రజలలో చైతన్యాన్ని, సమాజ మార్పుపై నమ్మకాన్ని పెంపొందించే విధంగా ఈ వేడుకలు కొనసాగాయి.