రాజీమార్గంలో వివాదాలు పరిష్కరించుకోవడమే మేలు - జిల్లా జడ్జి రత్న పద్మావతి

జగిత్యాల సెప్టెంబర్ 24 (ప్రజా మంటలు):

జాతీయ మెగా లోక్ అదాలత్ విజయవంతం చేయడం లో కృషి చేసిన పోలీస్ అధికారులను సిబ్బందిని అభినందించిన  జిల్లా జడ్జి రత్న పద్మావతి ప్రశంసా పత్రాలు అందజేసారు.

రాజీ మార్గాన కేసులను పరిష్కరించడానికి  ఈనెల 13న నిర్వహించిన జాతీయ మెగా లోక్‌ అదాలత్ లో, జిల్లా పరిధిలో 3214  కేసుల పరిష్కారానికి కృషి చేసిన పోలీస్ అధికారులు, సిబ్బంది, బార్ అసోసియేషన్ వారిని జిల్లా జడ్జి శ్రీమతి రత్న పద్మావతి అబినందించారు. వారికి
ఈ రోజు జిల్లా కోర్టు ప్రాంగణం లో  ప్రశంసా పత్రాలు అందజేశారు. 

ఈ సందర్భంగా జిల్లా జడ్జి శ్రీమతి రత్న పద్మావతి  మాట్లాడుతూ, పోలీస్ అధికారులు, బార్ అసోసియేషన్, కోర్టు సిబ్బంది ఎంతో కష్టపడి  కేసులలో ఉన్న కక్షిదారులను స్వయంగా కలిసి రాజీ మార్గం రాజ మార్గమని, లోక్ అదాలత్ ద్వారా సత్వర న్యాయం జరుగుతుందని అన్నారు  ఇరు వర్గాలకు న్యాయం జరుగుతుందని అవగాహన కల్పించినందున ఈ కేసులు పరిష్కరించబడినాయని అన్నారు.

గతంలో ఎప్పుడు లేని విధంగా కేసులను పరిష్కరించడంలో చక్కగా వ్యవహరించిన బార్ అసోసియేషన్, పోలీస్ అధికారులను, సిబ్బందిని అభినందిస్తూ, రానున్న రోజుల్లో ఇదే స్ఫూర్తితో పని చేయాలని అధికారులను కోరారు.  

ఈ కార్యక్రమంలో జిల్లా ఎస్పీ అశోక్ కుమార్, అదనపు జిల్లా జడ్జి నారాయణ, సెక్రటరీ లీగల్ సెల్ వెంకట మల్లిక్ సుబ్రమణ్య శర్మ, శ్రీనిజ కొహిర్కార్, మేజిస్ట్రేట్, బార్ కౌన్సిల్ అధ్యక్షులు మరియు జగిత్యాల జిల్లా పోలీసు అధికారులు మరియు సిబ్బంది పాల్గొన్నారు.