సోను, సతీష్ ల పార్టీ నుండి బహిష్కరణ

"లొంగుబాట్లు విప్లవాన్ని ఆపలేవు; అంతిమ విజయం ప్రజలదే"

మావోయిస్టు కేంద్ర కమిటీ సభ్యుడు అభయ్ పత్రికా ప్రకటన 

హైదరాబాద్‌, అక్టోబర్ 16 (ప్రజా మంటలు):
భారత కమ్యూనిస్టు పార్టీ (మావోయిస్టు) కేంద్ర కమిటీ, పొలిట్ బ్యూరో సభ్యుడు సోను, దండకారణ్య స్పెషల్ జోనల్ కమిటీ సభ్యుడు వివేక్, అలాగే ఉత్తర సబ్‌జోనల్ బ్యూరో ఇంచార్జ్ సతీష్ తదితరులు శత్రువుకు లొంగిపోయారని, వీరిని విప్లవ ద్రోహులు, పార్టీ విచ్ఛిన్నకులు, విప్లవ ప్రతిఘాతకులుగా అభివర్ణిస్తూ పార్టీ నుండి బహిష్కరించామని కమిటీ ప్రకటించింది. కేంద్రకమిటీ సభ్యుడు అభయ్ పేర విడుదలైన లేఖలో వీరిపై తీవ్రమైన ఆరోపణలు చేశారు.

మహారాష్ట్ర ముఖ్యమంత్రి దేవేంద్ర ఫడ్నవీస్ సమక్షంలో 61 మంది మావోయిస్టులు పోలీసులకు లొంగిపోవడం, 50 తుపాకులు అప్పగించడం “విప్లవ ద్రోహం”గా కేంద్ర కమిటీ అభివర్ణించింది. పార్టీ ప్రతినిధి అభయ్ సంతకం చేసిన పత్రికా ప్రకటనలో, సోను–సతీష్‌లు "ప్రాణభీతి, అవకాశవాదం, మితవాద వైఖరితో విప్లవ తత్వాన్ని విడిచిపోయారని" ఆరోపించారు.

మావోయిస్టు కేంద్ర కమిటీ ప్రకటనలో, "సోను, సతీష్ ల ముఠా ప్రజల వద్దకు వచ్చినా విప్లవ ప్రజలు వారిని తిరస్కరించాలి" అని పిలుపునిచ్చింది.
అదే సమయంలో, లొంగిపోయిన వారిలో నిజాయితీ గలవారు తిరిగి ప్రజాపక్షానికి వస్తే హాని ఉండదని హామీ ఇచ్చింది.

విప్లవోద్యమం తాత్కాలిక వెనకంజలో ఉన్నప్పటికీ అది శాశ్వత ఓటమి కాదని, పార్టీ, పీ.ఎల్.జీ.ఏ., ప్రజా ఉద్యమాలను పునర్నిర్మించి పోరాటాన్ని కొనసాగిస్తామని కమిటీ హామీ ఇచ్చింది."లొంగుబాట్లు విప్లవాన్ని ఆపలేవు; అంతిమ విజయం ప్రజలదే" అని ప్రకటనలో పేర్కొంది.