మానవత్వం మరిచిన పిన్ని మమత

కోరుట్లలో హృదయ విదారక ఘటన  

కోరుట్ల జూలై 07:

ఇటీవల కోట్లలో చోటుచేసుకున్న చిన్నారి హత్య కేసు, జిల్లాను విషాదంలో ముంచింది. కేవలం ఐదు సంవత్సరాల చిన్నారి హితీక్షను ఆమె సొంత "పిన్ని మమత" అత్యంత క్రూరంగా హతమార్చిన దృశ్యం, ప్రతి మనిషి హృదయాన్ని కలిచివేసింది.

పోలీసులు ఈ కేసును, సీసీ టీవీ ఫుటేజ్ ఆధారంగా కేసును ఛేదించగలిగారు.,  ఆడుకుందామని చెప్పి హితీక్షను బాత్రూంకు తీసుకెళ్లిన పిన్ని మమత, అక్కడే కత్తితో పొడిచి హత్య చేసింది. అనంతరం ఏమీ తెలియనట్టు నటిస్తూ, కుటుంబ సభ్యులతో కలిసి ఏడవడమంటే ఆమె హృదయం ఎంత క్రూరంగా మారిందో చెప్పడానికే మాటలు రావు.

ఈ దారుణానికి తోడికోడలిపై ఉన్న అసూయ, కోపమే కారణంగా పోలీసులు ప్రాథమికంగా నిర్ధారించారు. కుటుంబ సంబంధాలు ప్రేమ పునాది మీద నిర్మించబడ్డవిగా భావిస్తాం. కానీ ఇక్కడ అదే బంధం ప్రాణాలను బలితీసుకున్న విషాదకర ఉదంతంగా మారింది.

ఇలాంటి ఘటనలు సమాజంలోని మానవతా విలువల పతనాన్ని ప్రతిబింబిస్తున్నాయి. మనిషి కోపం, అసూయ, స్వార్థం వల్ల ఎంతటి క్రూరంగా మారగలడో ఈ సంఘటన మరోసారి తేటతెల్లం చేసింది.

చిన్నారుల రక్షణ కోసం మరింత కఠిన చట్టాలు, సామాజిక అవగాహన, మానసిక ఆరోగ్యంపై దృష్టి పెరగాల్సిన అవసరం ఎంతో ఉంది.

ఇలాంటి సంఘటనలు మన మనసును కలిచివేస్తున్నా, సామాజికంగా మేలుకోమన్న హెచ్చరికలుగా తీసుకోవాలి.