నిర్లక్ష్యంగా వాహనం నడిపి వ్యక్తి మృతికి కారణమైన ఘటనలో నిందితునికి పది నెలల జైలు శిక్ష

జగిత్యాల ఆగస్టు 29 ( ప్రజా మంటలు)
 నిజామాబాద్ జిల్లా మోర్తాడ్ మండలం తిమ్మాపూర్ గ్రామానికి చెందిన రాజుల సాయన్న అనే ఆటో డ్రైవర్ తేది 25-02-2020న మెట్‌పల్లి మండలం మేడిపల్లి గ్రామానికి కిరాయికి వెళ్లి తన ఆటోను రోడ్డు పక్కన పార్క్ చేశాడు.

అదే సమయంలో నిజామాబాద్ జిల్లా ముప్కల్ గ్రామానికి చెందిన RTC కండక్టర్ దుంపటి లక్ష్మీ రాజ్యం (56 సంవత్సరాలు, Swift Dzire B/No.TS 16ES 1403) తన కారును అతివేగంగా, అజాగ్రత్తగా నడిపి, పార్క్ చేసిన ఆటోను వెనుక నుండి బలంగా ఢీకొట్టాడు. ఈ ప్రమాదంలో రాజుల సాయన్న తీవ్రంగా గాయపడి ఆసుపత్రిలో చికిత్స పొందుతూ మరణించాడు.

మృతుని బంధువుల ఫిర్యాదు మేరకు  అప్పటి ఇబ్రహీంపట్నం ఎస్సై అశోక్  కేసు నమోదు చేయగా, మెట్‌పల్లి సీ.ఐ ఎల్. శ్రీను  పకడ్బందీగా విచారణ జరిపి సాక్ష్యాధారాలు సేకరించి కోర్టులో ఛార్జ్ షీట్ దాఖలు చేశారు.కోర్ట్ ట్రయల్ సమయంలో, ఇబ్రహీంపట్నం పోలీస్ స్టేషన్ కోర్టు కానిస్టేబుల్ ఎం. చక్రపాణి సాక్షులను ప్రవేశపెట్టగా, ఏపీపీ ప్రణయ్ గారు సమర్థవంతంగా వాదనలు వినిపించారు.

ఆధారాలను పరిశీలించిన అనంతరం, గౌరవ మెజిస్ట్రేట్  ఎం. అరుణ్ కుమార్  నిందితుడికి పది నెలల జైలు శిక్ష విధించారు.

ఈ కేసులో నిందితునికి శిక్ష పడటంలో కృషి చేసిన సీఐ ఎల్. శ్రీను, ఎస్సై ఎం. అశోక్ కుమార్, కానిస్టేబుల్ ఎం. చక్రపాణిలను జిల్లా ఎస్పీ  అశోక్ కుమార్  ప్రత్యేకంగా అభినందించారు.