ఉజ్జయిని మహాకాళి ఆలయ చండీ యాగం...

పాల్గొని ప్రత్యేక పూజలు చేసిన డా.కోట నీలిమ

సికింద్రాబాద్ సెప్టెంబర్ 26 (ప్రజా మంటలు): 

దేవి శరన్నవరాత్రుల సందర్భంగా శుక్రవారం పీసీసీ ఉపాధ్యక్షురాలు, సనత్ నగర్ నియోజకవర్గ కాంగ్రెస్ పార్టీ ఇంచార్జి డాక్టర్ కోట నీలిమ ఉజ్జయిని మహాకాళి అమ్మవారిని దర్శించుకున్నారు. ఈ సందర్భంగా మహాలక్ష్మి రూపంలో దర్శనమిస్తున్న అమ్మవారిని దర్శించుకొని ప్రత్యేక పూజలు నిర్వహించారు. అంతకుముందు ఆలయ పండితులు, సిబ్బంది కోట నీలిమ కు ఆలయ సంప్రదాయం ప్రకారం సన్నాయి వాయిద్యాలతో ఆహ్వానం పలికారు. ఈ క్రమంలో ఆలయంలో ఏర్పాటు చేసిన చండీ యాగంలో పాల్గొన్నారు. భక్తులతో మమేకమై వసతులపై ఆరా తీశారు.

ఈ సందర్భంగా కోట నీలిమ మాట్లాడుతూ..కోరిన కోర్కెలు తీర్చే తల్లిగా భక్తుల పూజలు అందుకుంటున్న అమ్మవారి దర్శనానికి వచ్చే భక్తుల సంఖ్య గణనీయంగా పెరిగిందని చెప్పారు. ఆలయానికి వచ్చే భక్తులు ఎలాంటి అసౌకర్యానికి గురికావద్దనే ఆలోచనతో కాంగ్రెస్ ప్రభుత్వం వచ్చాక ఆలయాన్ని ఎంతో అభివృద్ధి చేసినట్లు వివరించారు. అందులో భాగంగానే ప్రభుత్వం ఆలయానికి భారీగా నిధులు కేటాయిస్తోందన్నారు. శరన్నవరాత్రుల సందర్భంగా ఐదవ రోజు మహాలక్ష్మి దేవి అలంకరణలో అమ్మవారిని దర్శించడం సంతోషదాయకమని తెలిపారు. దేవి సమక్షంలో చండీ యాగంలో పాల్గొనడం అదృష్టంగా భావిస్తున్నట్టు పేర్కొన్నారు. ఆలయ అధికారులు భక్తులకు ఎటువంటి అసౌకర్యం కలగకుండా ఏర్పాట్లు చేశారని తెలిపారు. మరోవైపు పలు డివిజన్లలో ఏర్పాటు చేసిన కనక దుర్గ మండపాలను సందర్శించి దుర్గామాత అమ్మవార్లను దర్శించుకుని ప్రత్యేక పూజలు నిర్వహించారు.