మాజీ సర్పంచులకు రూ.10 వేల పెన్షన్ ఇవ్వాలి

జగిత్యాల, సెప్టెంబర్‌ 11 (ప్రజా మంటలు):

2023 ఎన్నికల మేనిఫెస్టోలో మాజీ సర్పంచులకు ఇచ్చిన హామీలను కాంగ్రెస్‌ ప్రభుత్వం మూడేళ్లుగా అమలు చేయడం లేదని తెలంగాణ మాజీ సర్పంచుల సంక్షేమ సంఘం రాష్ట్ర అధ్యక్షుడు బొడ్డు దేవయ్య విమర్శించారు. శుక్రవారం జగిత్యాల ప్రెస్‌క్లబ్‌లో జిల్లా స్థాయి మాజీ సర్పంచుల సంఘం ఆధ్వర్యంలో నిర్వహించిన విలేకరుల సమావేశంలో ఆయన మాట్లాడారు.

మాజీ సర్పంచులందరికీ నెలకు రూ.10 వేల పెన్షన్, కుటుంబ సభ్యులకు హెల్త్‌ కార్డుల ద్వారా కార్పొరేట్‌ వైద్యం, ఉచిత బస్‌పాస్‌, అర్హులకు ఇళ్ల మంజూరు చేయాలని డిమాండ్‌ చేశారు. స్థానిక సంస్థల ఎమ్మెల్సీ ఎన్నికల్లో మాజీ సర్పంచులకు ఓటు హక్కు కల్పించాలని కోరారు.

ఐదేళ్ల పాటు గ్రామాలకు సేవలందించిన మాజీ సర్పంచులను ప్రభుత్వం పట్టించుకోకపోవడం దారుణమని జిల్లా అధ్యక్షుడు మచ్చ నారాయణ అన్నారు. డిమాండ్లు నెరవేర్చకపోతే రాష్ట్రంలోని మాజీ సర్పంచులందరినీ ఏకం చేసి సంఘటితంగా ఉద్యమిస్తామని దేవయ్య హెచ్చరించారు.

సర్పంచ్‌ ఎన్నికలను ఐదేళ్లు పూర్తికాగానే నిర్వహించి, నూతన సర్పంచులకు వెంటనే బాధ్యతలు అప్పగించాలని జిల్లా అధికార ప్రతినిధి ఎన్నం కిషన్‌రెడ్డి కోరారు. గ్రామాభివృద్ధి నిధులు దారి మళ్లించకుండా చూడాలని ప్రభుత్వాన్ని డిమాండ్‌ చేశారు.

జిల్లా ప్రధాన కార్యదర్శి దుమ్మని బాల ముకుందం మాట్లాడుతూ మాజీ సర్పంచుల న్యాయమైన డిమాండ్లను ప్రభుత్వం వెంటనే పరిష్కరించాలని కోరారు. జిల్లాలో మండల స్థాయి కమిటీలు ఏర్పాటు చేసి సంఘాన్ని మరింత పటిష్టం చేస్తామని పలువురు మాజీ సర్పంచులు తెలిపారు.

సమావేశంలో మాజీ సర్పంచులు బుర్ర మల్లేశం కె.గౌడ్‌, మర్రిపెల్లి నారాయణ గౌడ్‌, అంకతి గంగాధర్‌, పత్తిరెడ్డి మహిపాల్‌రెడ్డి, ముదిగొండ శేఖర్‌, జక్కుల తిరుపతి, కొత్తపేట సాయగౌడ్‌, జంగా గంగస్వామి, ఎండీ సలీం, మోహన్‌రావు, మారు రాజేశ్వర్‌రెడ్డి, సామళ్ల లావణ్య వేణు, దమ్మా లతశ్రీ నర్సింగం, జిల్లాపెల్లి శారద గంగారాం, లైసెటి లక్ష్మీరాజు, అల్లంకొండ సుదర్శన్‌, నాంబారి కిషన్‌, కైరి ముత్యం గౌడ్‌, అంజగౌడ్‌, నరేందర్‌, రెబ్బాస్‌ మల్లయ్య తదితరులు పాల్గొన్నారు.