ఆర్యవైశ్యులకు అండగా ప్రభుత్వం : మంత్రి లక్ష్మణ్ కుమార్

ధర్మపురి, సెప్టెంబర్ 06, ప్రజా మంటలు:
ఆర్యవైశ్యుల సంక్షేమానికి ప్రభుత్వం అండగా నిలుస్తుందని రాష్ట్ర సాంఘిక సంక్షేమ శాఖ మంత్రి, ధర్మపురి ఎమ్మెల్యే అడ్లూరి లక్ష్మణ్ కుమార్ అన్నారు. ఆదివారం ధర్మపురి పట్టణంలోని శ్రీ లక్ష్మీనరసింహ గార్డెన్స్‌లో నిర్వహించిన ధర్మపురి మండల, పట్టణ ఆర్యవైశ్య సంఘాల నూతన కార్యవర్గాల పదవీ స్వీకార ప్రమాణ కార్యక్రమానికి మంత్రి ముఖ్య అతిథిగా హాజరయ్యారు.

ధర్మపురి మండల ఆర్యవైశ్య సంఘం అధ్యక్షుడిగా సాయిని శ్రీనివాస్, ధర్మపురి పట్టణ ఆర్యవైశ్య సంఘం అధ్యక్షుడిగా పిన్న శ్రీనివాస్ ఎన్నికైన సందర్భంగా నూతన కార్యవర్గ సభ్యులతో ప్రమాణ స్వీకారం చేయించారు. అనంతరం మంత్రి నూతన కార్యవర్గానికి శుభాకాంక్షలు తెలిపారు.

ఈ సందర్భంగా మంత్రి లక్ష్మణ్ కుమార్ మాట్లాడుతూ ఆర్యవైశ్యులు ఎక్కడ ఉన్నా అనేక సేవా కార్యక్రమాలను నిర్వహిస్తూ సమాజ అభివృద్ధిలో తమ వంతు పాత్ర పోషిస్తున్నారని కొనియాడారు. ఉమ్మడి ఆంధ్రప్రదేశ్‌లో ఆర్థిక శాఖ మంత్రిగా, అనంతరం ముఖ్యమంత్రిగా పనిచేసిన కొణిజేటి రోశయ్యకు కాంగ్రెస్ పార్టీ అవకాశం కల్పించిన విషయాన్ని ఆయన గుర్తు చేశారు.

ధర్మపురి ఎమ్మెల్యేగా తనను ప్రజలు గెలిపించడం పూర్వజన్మలో చేసుకున్న పుణ్యఫలంగా భావిస్తున్నానని మంత్రి అన్నారు. ఎమ్మెల్యేగా ఎన్నికైన నాటి నుంచి ప్రజల సంక్షేమం, అభివృద్ధి కోసం పనిచేస్తున్నానని తెలిపారు. ఆర్యవైశ్యులు ప్రభుత్వానికి అండగా నిలిచి అభివృద్ధి కార్యక్రమాల్లో భాగస్వాములు కావాలని కోరారు.

ఆర్యవైశ్యుల సమస్యలు, సంక్షేమానికి సంబంధించి తన వంతు సహకారం ఎల్లప్పుడూ ఉంటుందని మంత్రి హామీ ఇచ్చారు. నూతన కార్యవర్గం సమాజ సేవలో మరింత చురుకుగా పనిచేయాలని ఆకాంక్షిస్తూ వారికి శుభాకాంక్షలు తెలిపారు.