అసెంబ్లీ గేటు వద్ద ఉద్రిక్తత.. బీఆర్‌ఎస్ నిరసన

హైదరాబాద్, సెప్టెంబర్ 07, ప్రజా మంటలు: తెలంగాణ అసెంబ్లీ వద్ద బీఆర్‌ఎస్ ఎమ్మెల్యేలు, ఎమ్మెల్సీల నిరసనతో ఉద్రిక్త పరిస్థితులు నెలకొన్నాయి. కాంగ్రెస్ ప్రభుత్వ వెయ్యి రోజుల పాలనను నిరసిస్తూ బీఆర్‌ఎస్ ప్రజాప్రతినిధులు నల్ల దుస్తులు ధరించి అసెంబ్లీకి వచ్చారు.

నల్ల టీషర్ట్‌లు ధరించి అసెంబ్లీ ప్రాంగణంలోకి ప్రవేశించేందుకు బీఆర్‌ఎస్ ఎమ్మెల్యేలు, ఎమ్మెల్సీలు ప్రయత్నించగా పోలీసులు అభ్యంతరం వ్యక్తం చేశారు. దీంతో అసెంబ్లీ ప్రధాన గేటు వద్ద పోలీసులకు, బీఆర్‌ఎస్ ప్రజాప్రతినిధులకు మధ్య వాగ్వాదం, తోపులాట చోటుచేసుకుంది.

ఈ క్రమంలో మాజీ మంత్రి, బీఆర్‌ఎస్ ఎమ్మెల్యే హరీశ్ రావు తన టీషర్ట్‌ను విప్పి బనియన్‌తోనే నిరసన వ్యక్తం చేశారు. బనియన్‌తో అసెంబ్లీలోకి వెళ్లేందుకు ఆయన ప్రయత్నించగా పోలీసులు ప్రధాన గేటు వద్ద అడ్డుకున్నట్లు సమాచారం.

మరోవైపు బీఆర్‌ఎస్ మహిళా ఎమ్మెల్యేలు నల్ల చీరలు ధరించి గన్‌పార్క్ నుంచి అసెంబ్లీ వరకు నిరసన ర్యాలీ నిర్వహించారు. అసెంబ్లీ గేటు వద్ద ఎమ్మెల్యే సునీతా లక్ష్మారెడ్డితో పోలీసులు అనుచితంగా ప్రవర్తించారని బీఆర్‌ఎస్ ఎమ్మెల్యేలు ఆరోపించారు. ఆమె చీరను పోలీసులు లాగారని ఆరోపిస్తూ ఆందోళన వ్యక్తం చేశారు. ఈ ఘటనతో సునీతా లక్ష్మారెడ్డి కంటతడి పెట్టినట్లు పార్టీ వర్గాలు తెలిపాయి.

అసెంబ్లీ ప్రాంగణం వద్ద నిరసన కొనసాగుతున్న సమయంలో బీఆర్‌ఎస్ వర్కింగ్ ప్రెసిడెంట్ కేటీఆర్‌ను పోలీసులు అదుపులోకి తీసుకున్నట్లు సమాచారం. నల్ల దుస్తులతో అసెంబ్లీలోకి ప్రవేశించే విషయంలో ఏర్పడిన వివాదం తీవ్రరూపం దాల్చడంతో పోలీసులు కేటీఆర్‌ను అదుపులోకి తీసుకున్నారు.

మహిపాల్‌రెడ్డికి కేసీఆర్ గ్రీన్ సిగ్నల్?

ఇదిలా ఉండగా, పటాన్‌చెరు ఎమ్మెల్యే మహిపాల్‌రెడ్డి వ్యవహారం తెలంగాణ రాజకీయాల్లో మరోసారి చర్చనీయాంశంగా మారింది. బీఆర్‌ఎస్ అధినేత కేసీఆర్ ఆయనను తిరిగి తమ వర్గంలోకి ఆహ్వానించడంతో పార్టీ ఫిరాయింపుల అంశంపై రాజకీయ చర్చ మొదలైంది.

ఎర్రవెల్లిలో నిర్వహించిన బీఆర్‌ఎస్‌ఎల్పీ సమావేశానికి మహిపాల్‌రెడ్డిని ఆహ్వానించినట్లు సమాచారం. గతంలో ఆయనపై అనర్హత పిటిషన్‌ను బీఆర్‌ఎస్ దాఖలు చేసిన నేపథ్యంలో తాజా పరిణామం రాజకీయంగా ప్రాధాన్యత సంతరించుకుంది.

పటాన్‌చెరులో స్థానిక కాంగ్రెస్ నాయకత్వంతో సమన్వయం కుదరకపోవడం, తన నియోజకవర్గంలో జరిగిన మున్సిపల్ ఎన్నికల్లో బీఆర్‌ఎస్‌కు అనుకూల ఫలితాలు రావడం వంటి పరిణామాల నేపథ్యంలో మహిపాల్‌రెడ్డి మళ్లీ బీఆర్‌ఎస్‌కు దగ్గరయ్యారనే చర్చ రాజకీయ వర్గాల్లో సాగుతోంది.

మహిపాల్‌రెడ్డి వ్యవహారం కాంగ్రెస్‌లో అసంతృప్తిగా ఉన్న ఇతర ఎమ్మెల్యేలకు కూడా బీఆర్‌ఎస్ వైపు వెళ్లేందుకు మార్గం చూపుతుందా? లేక ఇది ఒక్క నియోజకవర్గానికే పరిమితమైన పరిణామమా? అనేది రానున్న రోజుల్లో తేలాల్సి ఉంది.