వేతన చెల్లింపులో జాప్యంపై మానవ హక్కుల కమిషన్ ఆగ్రహం

ఫారమ్‌–16 జారీ, జాప్యానికి బాధ్యులపై చర్యలు తీసుకోవాలని తెలంగాణ రాష్ట్ర మానవ హక్కుల కమిషన్ సిఫార్సు

హైదరాబాద్ ఆగస్ట్ 28 (ప్రజా మంటలు):

ఉద్యోగికి సకాలంలో వేతనం చెల్లించకపోవడం, ఆదాయపు పన్నుకు సంబంధించిన పత్రాలు అందించడంలో జాప్యం చేయడం మానవ హక్కుల పరిరక్షణకు సంబంధించిన అంశమేనని తెలంగాణ రాష్ట్ర మానవ హక్కుల కమిషన్ స్పష్టం చేసింది. ఈ మేరకు హెచ్‌ఆర్‌సీ నంబర్‌ 4763/2021 కేసులో కమిషన్‌ చైర్‌పర్సన్‌ డా. జస్టిస్‌ షమీమ్‌ అక్తర్‌ అధ్యక్షతన 28 జూలై 2026న ఉత్తర్వులు జారీ అయ్యాయి.

ఫిర్యాదుదారు 23 అక్టోబర్‌ 2015 నుంచి 24 ఫిబ్రవరి 2017 వరకు గ్రేటర్‌ వరంగల్‌ మున్సిపల్‌ కార్పొరేషన్‌లో కార్యనిర్వాహక ఇంజినీర్‌గా పనిచేశారు. అయితే ఆయనకు సంబంధించిన రూ.14,24,488 వేతనం సకాలంలో చెల్లించలేదు. మునుపటి పోస్టింగ్‌ స్థలం నుంచి చివరి వేతన ధ్రువీకరణ పత్రం అందిన అనంతరం 2018 అక్టోబర్‌లో మాత్రమే ఆ మొత్తాన్ని ఒకేసారి చెల్లించినట్లు కమిషన్‌ దృష్టికి వచ్చింది.

వేతనం చెల్లించడంలో జరిగిన జాప్యంతో పాటు, సంబంధిత కాలానికి సంబంధించిన ఫారమ్‌–16, బిల్లుల వారీ వివరాలు, టీడీఎస్‌ చెల్లింపుల వివరాలు కూడా సకాలంలో అందకపోవడంతో ఆదాయపు పన్ను శాఖ నుంచి నోటీసులు అందుకున్నట్లు ఫిర్యాదుదారు పేర్కొన్నారు.

అధికారుల నుంచి అందిన నివేదికలను పరిశీలించిన మానవ హక్కుల కమిషన్‌, వేతనం చెల్లించడంలో ఒక సంవత్సరానికి పైగా జాప్యం జరిగినట్లు గుర్తించింది. ఉద్యోగి బదిలీ అయిన సందర్భంలో సేవా రిజిస్టర్‌, చివరి వేతన ధ్రువీకరణ పత్రం తదితర సేవా రికార్డులను సకాలంలో బదిలీ చేయడం పరిపాలనా అధికారుల బాధ్యత అని స్పష్టం చేసింది. ఉద్యోగి బదిలీ కారణంగా వేతన చెల్లింపులో అంతరాయం ఏర్పడకూడదని పేర్కొంది.

ఈ వ్యవహారంలో ఇంజినీర్‌–ఇన్‌–చీఫ్‌, ప్రజారోగ్య ఇంజినీరింగ్‌ మరియు మున్సిపల్‌ పరిపాలన శాఖతో పాటు గ్రేటర్‌ వరంగల్‌ మున్సిపల్‌ కార్పొరేషన్‌ కమిషనర్‌ కార్యాలయాల స్థాయిలో జాప్యం జరిగినట్లు కమిషన్‌ అభిప్రాయపడింది.

మానవ హక్కుల పరిరక్షణ చట్టం–1993లోని సెక్షన్‌ 18 కింద తన అధికారాలను వినియోగించిన కమిషన్‌, మున్సిపల్‌ పరిపాలన–పట్టణాభివృద్ధి శాఖ ముఖ్య కార్యదర్శి ఈ వ్యవహారాన్ని పరిశీలించి, ఫిర్యాదుదారుడి వేతనం చెల్లింపులో జరిగిన జాప్యంతో పాటు 2015 అక్టోబర్‌ నుంచి 2017 ఫిబ్రవరి వరకు కాలానికి సంబంధించిన ఫారమ్‌–16 జారీ అంశంపై అవసరమైన చర్యలు తీసుకోవాలని సిఫార్సు చేసింది.

ఈ సిఫార్సుతో కేసులో తదుపరి చర్యలను తెలంగాణ రాష్ట్ర మానవ హక్కుల కమిషన్‌ ముగించింది.