జగిత్యాలలో కాంగ్రెస్ హామీల అమలుపై బీఆర్ఎస్ ఆందోళన

జగిత్యాల, సెప్టెంబర్ 07 (ప్రజా మంటలు):

కాంగ్రెస్ ప్రభుత్వం ఎన్నికల సమయంలో ప్రజలకు ఇచ్చిన ఆరు గ్యారంటీలు, 420 హామీలను తక్షణమే అమలు చేయాలని బీఆర్ఎస్ నాయకులు డిమాండ్ చేశారు. బీఆర్ఎస్ రాష్ట్ర కమిటీ పిలుపు మేరకు జగిత్యాల నియోజకవర్గంలోని వివిధ మండలాల్లో నిరసన కార్యక్రమాలు నిర్వహించగా, జిల్లా కేంద్రంలో బీఆర్ఎస్ రాష్ట్ర ప్రధాన కార్యదర్శి తాటిపర్తి జీవన్ రెడ్డి ఆధ్వర్యంలో నాయకులు, కార్యకర్తలు ప్రజావాణిలో కలెక్టర్‌కు వినతిపత్రం సమర్పించారు.

కాంగ్రెస్ ప్రభుత్వం హామీల అమలులో విఫలమైందని ఆరోపిస్తూ బీఆర్ఎస్ నాయకులు కలెక్టరేట్ వద్ద మెరుపు ధర్నా నిర్వహించారు. అసెంబ్లీకి నల్ల దుస్తులు ధరించి వెళ్లిన బీఆర్ఎస్ ఎమ్మెల్యేలను అరెస్టు చేయడాన్ని నిరసిస్తూ, వారిని వెంటనే విడుదల చేసి శాసనసభకు అనుమతించాలని డిమాండ్ చేశారు. ఈ సందర్భంగా ముఖ్యమంత్రి రేవంత్ రెడ్డికి వ్యతిరేకంగా నినాదాలు చేశారు.

బీఆర్ఎస్ రాష్ట్ర ప్రధాన కార్యదర్శి తాటిపర్తి జీవన్ రెడ్డి మాట్లాడుతూ, పార్టీ అధినేత కేసీఆర్ ఆలోచనలకు అనుగుణంగా, కేటీఆర్ దిశానిర్దేశంతో కాంగ్రెస్ ప్రభుత్వ హామీల అమలుపై ఐదు రోజులుగా నిరసన కార్యక్రమాలు చేపడుతున్నామని తెలిపారు. మహాలక్ష్మి పథకం కింద నెలకు రూ.2,500, వృద్ధులకు రూ.4,000, బీడీ కార్మికులకు పెన్షన్ వంటి హామీలు అమలు కాలేదని ఆరోపించారు. ఆరు గ్యారంటీల్లో ఏ ఒక్కటీ పూర్తి స్థాయిలో అమలు కాలేదని విమర్శించారు.

జగిత్యాలలో ప్రభుత్వ ఆస్తుల పరిరక్షణపై ప్రశ్నలు

జగిత్యాల తహసీల్దార్ కార్యాలయ పరిధిలో పెట్రోల్ బంక్ ఏర్పాటుకు సంబంధించి సుమారు రూ.100 కోట్ల విలువైన ప్రభుత్వ ఆస్తిని ఏకపక్షంగా ఒక సంస్థకు అప్పగించారని జీవన్ రెడ్డి ఆరోపించారు. పెట్రోల్ బంక్ కోసం 20 గుంటల మున్సిపల్ స్థలాన్ని తీసుకుని నాలుగు గుంటల్లో మాత్రమే బంక్ ఏర్పాటు చేసి, మిగిలిన 16 గుంటల భూమి అన్యాక్రాంతమైందని పేర్కొన్నారు. దీనిపై చర్యలు తీసుకుంటామని అధికారులు చెప్పి పది నెలలు గడిచినా ఎలాంటి చర్యలు చేపట్టలేదని విమర్శించారు.

కొత్త బస్‌స్టాండ్‌లో కూడా పెట్రోల్ బంక్ పేరుతో మరో రూ.100 కోట్ల విలువైన ఆస్తి ఆక్రమణకు గురైందని ఆయన ఆరోపించారు. పాత బస్‌స్టాండ్ వద్ద పోలీసుల ఆధ్వర్యంలో పెట్రోల్ బంక్ ఏర్పాటు కోసం టెండర్లు పిలిచి మూడేళ్లు గడిచిన తర్వాత మరో ప్రాంతంలో పెట్రోల్ బంక్‌కు అనుమతి ఇవ్వడం వెనుక కారణాలేమిటని ప్రశ్నించారు.

ప్రభుత్వ అనుమతులు లేకుండానే చారిత్రక భవనాన్ని కూల్చివేశారని, మున్సిపల్ మరియు ఇతర దుకాణాలకు అధిక అద్దెలు వస్తున్నప్పటికీ తక్కువ అద్దెకు కేటాయింపులు చేశారని ఆరోపించారు. ప్రభుత్వ ఆస్తులను కాపాడాల్సిన అధికారులే వాటిని ప్రైవేటు సంస్థలకు ధారాదత్తం చేస్తున్నారని విమర్శించారు.

అక్రమ తవ్వకాలు, చెరువుల కబ్జాలపై చర్యలు తీసుకోవాలి

జిల్లాలో సహజ వనరులు, గుట్టలు అక్రమ తవ్వకాలతో కనుమరుగవుతున్నాయని జీవన్ రెడ్డి అన్నారు. తాటిపల్లి గుట్టల అక్రమ తవ్వకాలపై ప్రభుత్వం, అధికారులు ఎందుకు చర్యలు తీసుకోవడం లేదని ప్రశ్నించారు. అభివృద్ధి కోసం పార్టీ మారినట్లు చెప్పుకునే ఎమ్మెల్యేకు కోట్లాది రూపాయల విలువైన గుట్టల అక్రమ తవ్వకాలు కనిపించడం లేదా అని విమర్శించారు.

తిమ్మాపూర్ గ్రామంలోని ముప్పరపు చెరువు కబ్జాకు గురైందని పలుమార్లు అధికారులకు ఫిర్యాదు చేసినా స్పందన లేదన్నారు. ప్రభుత్వ ఆస్తులు, చెరువులు, సహజ వనరులను పరిరక్షించాల్సిన బాధ్యత అధికారులపై ఉందని, అక్రమాలపై తక్షణమే విచారణ చేపట్టాలని డిమాండ్ చేశారు.

చల్గల్‌లో సమగ్ర పాఠశాల ఏర్పాటుకు కలెక్టర్, మంత్రి అడ్లూరి లక్ష్మణ్ కుమార్, స్థానిక ఎమ్మెల్యే ప్రతిపాదించిన స్థలాన్ని పక్కన పెట్టి మరో ప్రాంతంలో ఏర్పాటు చేయడం వివక్షకు నిదర్శనమని ఆరోపించారు.

హామీలు అమలు చేయాలని దావ వసంత డిమాండ్

జగిత్యాల జిల్లా తొలి జడ్పీ చైర్‌పర్సన్ దావ వసంత సురేష్ మాట్లాడుతూ, శాసనసభ ఎన్నికల సందర్భంగా కాంగ్రెస్ మేనిఫెస్టోలో పేర్కొన్న హామీలను వెంటనే అమలు చేయాలని డిమాండ్ చేశారు. కాంగ్రెస్ ఇచ్చిన హామీలు కాగితాలకే పరిమితమయ్యాయని విమర్శించారు.

కేసీఆర్ హయాంలో ప్రజలకు పాలన చేరువ చేసేందుకు కొత్త జిల్లాలు ఏర్పాటు చేసి కలెక్టర్ కార్యాలయాలను నిర్మించారని, అయితే ప్రస్తుతం ఉద్యోగాల హామీ జాబ్‌లెస్ క్యాలెండర్‌గా మారిందని ఆరోపించారు. జిల్లాల్లో గుట్టలు, సహజ వనరులు కనుమరుగవుతున్నాయని, ప్రజావాణిలో ఎన్నిసార్లు ఫిర్యాదు చేసినా అధికారులు స్పందించడం లేదని అన్నారు.

రైతులకు రైతుబంధు, రైతుబీమా, రుణమాఫీ విషయంలో ప్రభుత్వం ఇచ్చిన హామీలు నెరవేర్చలేదని, పంటలకు గిట్టుబాటు ధర కల్పించడంలోనూ ప్రభుత్వం విఫలమైందని దావ వసంత ఆరోపించారు. కాంగ్రెస్ ప్రభుత్వం ఇచ్చిన 420 హామీలను అమలు చేయాలని కలెక్టర్‌కు వినతిపత్రం అందజేశామని తెలిపారు.

తెలంగాణలో ఇందిరమ్మ పాలన కనిపించడం లేదని, ప్రతి ఇంటికీ మోసం జరుగుతోందని ఆమె ఆరోపించారు. ప్రజా సమస్యలపై బీఆర్ఎస్ నిరంతరం పోరాటం చేస్తుందని స్పష్టం చేశారు.