కొడంగల్‌పై కవిత ఫోకస్.. కోస్గిలో పాంచజన్య సంకల్ప సభ

హైదరాబాద్, సెప్టెంబర్ 6, ప్రజా మంటలు:

ముఖ్యమంత్రి ఎ. రేవంత్ రెడ్డి ప్రాతినిధ్యం వహిస్తున్న కొడంగల్ నియోజకవర్గంపై తెలంగాణ రక్షణ సేన చీఫ్ కల్వకుంట్ల కవిత దృష్టి సారించారు. ఈ నెల 23న కొడంగల్ నియోజకవర్గంలోని కోస్గిలో ‘పాంచజన్య సంకల్ప సభ’ నిర్వహించనున్నట్లు ప్రకటించారు.

ఈ సభకు సంబంధించిన పోస్టర్‌ను ఆదివారం బంజారాహిల్స్‌లోని తెలంగాణ రక్షణ సేన కార్యాలయంలో కవిత ఆవిష్కరించారు. ఈ సందర్భంగా ఆమె మాట్లాడుతూ.. ప్రజలకు ఇచ్చిన హామీలను అమలు చేయడంలో సీఎం రేవంత్ రెడ్డి ప్రభుత్వం ఘోరంగా విఫలమైందని విమర్శించారు. ఆరు గ్యారంటీలను అమలు చేస్తామని చెప్పిన కాంగ్రెస్ ప్రభుత్వం కనీసం సగం హామీలను కూడా పూర్తిస్థాయిలో అమలు చేయలేకపోయిందని ఆరోపించారు.

కొడంగల్ కేంద్రంగా కాంగ్రెస్ ప్రభుత్వంపై పోరాటం

‘బూటకపు హామీలు, బోగస్ మాటలు’ చెబుతున్న కాంగ్రెస్ ప్రభుత్వానికి వ్యతిరేకంగా కొడంగల్ కేంద్రంగా పాంచజన్య శంఖారావం పూరిస్తున్నామని కవిత ప్రకటించారు. రాబోయే అసెంబ్లీ ఎన్నికల్లో తమ పార్టీని ప్రజలు గెలిపిస్తే ఉచిత విద్య, ఉచిత వైద్యం అందించడంతో పాటు పాంచజన్య సంకల్పంలో పేర్కొన్న ప్రతి హామీని వంద శాతం అమలు చేస్తామని హామీ ఇచ్చారు.

యువత, మహిళలు, సబ్బండ వర్గాల అభివృద్ధి, సాధికారతతో కూడిన బహుజన తెలంగాణను నిర్మించడమే తమ లక్ష్యమని కవిత తెలిపారు.

తెలంగాణ రక్షణ సేనలో చేరిన బీజేపీ కొడంగల్ ఇన్‌చార్జి

ఇదిలా ఉండగా, బీజేపీ కొడంగల్ అసెంబ్లీ నియోజకవర్గ ఇన్‌చార్జిగా పనిచేసిన ప్రభాకర్ కులకర్ణి తెలంగాణ రక్షణ సేనలో చేరారు. బంజారాహిల్స్‌లోని పార్టీ కార్యాలయంలో జరిగిన కార్యక్రమంలో కవిత ఆయనతో పాటు ఆయన అనుచరులకు కండువాలు కప్పి పార్టీలోకి ఆహ్వానించారు.

కవిత నాయకత్వంలో బహుజన తెలంగాణ సాధన కోసం తాను తెలంగాణ రక్షణ సేనలో చేరుతున్నట్లు ప్రభాకర్ కులకర్ణి తెలిపారు.

కొడంగల్ నియోజకవర్గంలో పార్టీ కార్యకలాపాలను విస్తరించడంలో భాగంగానే పాంచజన్య సంకల్ప సభను నిర్వహిస్తున్నామని పార్టీ వర్గాలు తెలిపాయి. ఈ కార్యక్రమంలో పార్టీ సీనియర్ నాయకులు అర్చనా సేనాపతి, గవినోళ్ల శ్రీనివాస్, సయ్యద్ ఇస్మాయిల్ తదితరులు పాల్గొన్నారు.

కొడంగల్ వేదికగా అధికార కాంగ్రెస్‌ను లక్ష్యంగా చేసుకుని కవిత రాజకీయ కార్యాచరణకు శ్రీకారం చుట్టడం.. స్థానిక రాజకీయాల్లో కొత్త సమీకరణాలకు దారితీసే అవకాశం ఉందనే చర్చ మొదలైంది.