జగిత్యాల: వడ్డే లింగాపూర్‌లో మహిళలకు ప్రత్యేక అవగాహన

జగిత్యాల (రూరల్) నవంబర్ 11 (ప్రజా మంటలు):

రాయికల్ మండలం వడ్డే లింగాపూర్ గ్రామంలో బాల్యవివాహాల నివారణపై ప్రత్యేక అవగాహన కార్యక్రమాన్ని జిల్లా మహిళాభివృద్ధి & శిశు సంక్షేమ శాఖ ఆధ్వర్యంలో సఖి వన్‌స్టాప్ సెంటర్ ఆధ్వర్యంలో నిర్వహించారు. గ్రామంలో తల్లులు, కిశోర బాలికలు, అంగన్వాడీ సిబ్బంది, ఆరోగ్య సిబ్బంది పెద్ద సంఖ్యలో పాల్గొన్నారు.

ఈ సందర్భంగా సఖి సెంటర్ ఉద్యోగిని శారద మాట్లాడుతూ—బాల్యవివాహం ఏ విధంగా బాలికల ఆరోగ్యం, భవిష్యత్‌ అవకాశాలపై ప్రతికూల ప్రభావం చూపుతుందో విశదంగా వివరించారు. చట్టపరంగా బాల్యవివాహం ఒక నేరమని, అటువంటి వివాహం జరిపినట్లయితే బాధ్యులపై పడే శిక్షలు, జరిమానాల గురించి అవగాహన కల్పించారు.

తరువాత ఐసిడీఎస్ సూపర్వైజర్ పద్మావతి పలు అత్యవసర హెల్ప్‌ లైన్ నంబర్లను వివరించారు. బాలల రక్షణ కోసం చైల్డ్ హెల్ప్ లైన్ 1098, పోలీస్ హెల్ప్ లైన్ 100, మహిళా సాయం కోసం 181, జాతీయ అత్యవసర హెల్ప్ లైన్ 112, వైద్య అత్యవసర పరిస్థితుల్లో 108, ఆపదలో ఉన్న బాలికల కోసం ప్రత్యేక నెంబర్ 8712670783, సైబర్ నేరాల నివేదికకు 1930, దివ్యాంగుల సహాయం కోసం 155326, వృద్ధుల హెల్ప్ లైన్ 14567 వంటి సేవల గురించి వివరించారు.

కార్యక్రమంలో పాల్గొన్న మహిళలు, బాలికలు బాల్యవివాహాలను అరికట్టేందుకు ప్రతిజ్ఞ చేశారు. గ్రామంలో బాలల రక్షణ కోసం విలేజ్ లెవెల్ చైల్డ్ ప్రొటెక్షన్ కమిటీలను ఏర్పాటు చేసి, బాధ్యతలు స్పష్టంగా తెలియజేశారు.

ఈ కార్యక్రమంలో కారోబర్ సంపూర్ణ, అంగన్వాడీ టీచర్లు, ఏఎన్ఎం దేవలక్ష్మి, వివోఏ లహరి తదితరులు పాల్గొన్నారు.