మావిడాకుల చాటునున్న ఓ పక్షి.. మా అక్క జాడ తెలిసిందా..!

కామ్రేడ్ లలితక్క అలియాస్ రంగవల్లి స్మృతిలో.

   కామ్రేడ్ రంగవల్లి 26 వర్ధంతి. విప్లవ జోహార్లు

(అల్లే రమేష్, సీనియర్ జర్నలిస్ట్, సిరిసిల్ల FB నుండి)

     *ప్రగతిశీల విద్యార్థి ఉద్యమాల నుంచి ప్రతిఘటన పోరాటాలు దాకా స్ఫూర్తినిచ్చే "ఆచరణ.."*

        ఉమ్మడి రాష్ట్రంలోని 80 దశకం  సమాజం కోసం తపన పడిన ఎందరో వీరులను అందించింది. ఉస్మానియా, కాకతీయ యూనివర్సిటీలలో విప్లవ మేఘాలు అల్లుకున్న కాలం. ఆ కాలమే పీడితుల పక్షాన నిలబడిన మానవీయ తరాన్ని రూపొందించింది. 
అలా రూపొందిన తరంలోనే కామ్రేడ్ రంగవల్లి ఎర్రజెండాను ఎత్తి పట్టింది. ప్రగతిశీల విద్యార్థి ఉద్యమాల నుంచి గోదావరిలోయ ప్రతిఘటన పోరాటాల నిర్మాణంలో కడదాకా సాగిన కామ్రేడ్ రంగవల్లి జీవితం నుంచి ఈ తరం నేర్చుకోవాల్సిన విషయాలను ఎన్నో అందించి పోయింది. 

      కామ్రేడ్ రంగవల్లి గురించి ప్రజా వాగ్గేయకారుడు గోరటి వెంకన్న పాటలో చెప్పుకుంటే "మావిడాకులు చాటునున్న ఓ పక్షి మా అక్క జాడ తెలిసిందా.. అంటూ రంగవల్లి అక్కను మదిలో తలుచుకొని" రంగవల్లి"సమాజం పట్ల చూపిన మానవీయతను ఆ పాటలో కన్నీళ్ళతో చెప్పిన తీరు కండ్ల ముందు ఇప్పటికీ కదిలినట్టే అనిపిస్తుంది. 

ఇంతకీ ఎవరీ"రంగవల్లి"..

      ఉమ్మడి రాష్ట్రంలోని నిజామాబాద్ జిల్లాలో వర్ని మండలంలోని వకీల్ఫారం లో  ఎస్ .వి .ఎల్ .నరసింహారావు గిరిజ దంపతులకు తొలిసూరి బిడ్డగా డిసెంబర్ 1959లో జన్మించారు.  ఇంటర్, డిగ్రీ లో ఉత్తమ విద్యార్థినిగా రాణిస్తూనే విప్లవ రాజకీయాల వైపు తన పయనం కొనసాగించారు. ఉస్మానియా, కాకతీయ యూనివర్సిటీలలో చదువుతూనే ప్రగతిశీల విద్యార్థి సంఘం రాజకీయాల్లో చురుకుగా పాల్గొన్నారు. పిడిఎస్యు "విజృంభణ "పత్రిక బాధ్యతలను కూడా నిర్వహించారు. అటు నుంచి గోదావరిలోయ ప్రతిఘటన పోరాటాల నిర్మాణంలో భాగమై సాగారు. విప్లవోద్యమంలో అనేక ఆటుపోట్లకు గురవుతున్న సమయంలో కూడా నిక్కచ్చిగా పీడిత ప్రజల పక్షాన నిలబడి తన ప్రయాణాన్ని కొనసాగించారు. అమరవీరుల ఆశయాలను సమున్నతంగా ఎత్తిపడుతూ ఆ ప్రయాణంలో ఉన్న క్రమంలోనే నవంబర్ 1999లో ఆనాటి ఉమ్మడి వరంగల్ జిల్లా ములుగు మండలం జగ్గన్నగూడెం గ్రామంలోని ఎల్లమ్మ బోడుగండి అటవీ ప్రాంతంలో జరిగిన బూటకపు ఎన్కౌంటర్లో తుది శ్వాస విడిచారు. తన జీవితాన్ని పీడిత ప్రజల కోసం ధారబోసిన" రంగవల్లి"తన జీవితాన్ని భవిష్యత్ తరాలకు ఆదర్శంగా స్ఫూర్తిగా అందించారు. లలితగా ప్రారంభమై ప్రజా ఉద్యమాలలో "రంగవల్లి"గా మహోన్నతమైన మానవీయ విలువలతో ప్రజలను ప్రేమిస్తూ వచ్చారు. 

 (నిర్మాణంలో రాజన్న సిరిసిల్ల జిల్లా వేములవాడ కమాన్ దగ్గరి రంగవల్లి విజ్ఞాన కేంద్రం)

    కామ్రేడ్ రంగవల్లికి రాజన్న సిరిసిల్ల జిల్లాతో విడదీయరాని బంధం ఉన్నది. 1981 ప్రాంతంలో ఆనాటి ఉమ్మడి కరీంనగర్ జిల్లాలో "గ్రామాలకు తరలండి"పి. డి. ఎస్. యు పిలుపులో భాగంగా"రంగవల్లి"ఈ ప్రాంతంలో ప్రజలతో మమేకం అయ్యారు. ప్రజల సాధక బాధకాలను  దగ్గరుండి తెలుసుకోవడమే కాకుండా పీడిత ప్రజల భవిష్యత్తుకు పోరాటాలకు బాసటగా నిలబడ్డారు. సుదీర్ఘకాలం ప్రజలే కేంద్రంగా పనిచేసి నమ్మిన ఆశయం కోసం కడదాకా నిలబడ్డ కామ్రేడ్ "రంగవల్లి"జ్ఞాపకమై మిగిలి 26 వసంతాలు గడుస్తున్న ఇప్పటికి స్ఫూర్తిని అందించే ఆమె జీవితం ఎగురుతున్న ఎర్రజెండలా రెపరెపలాడుతూ భవిష్యత్ తరాలకు స్ఫూర్తిని అందిస్తూనే ఉంటుంది.