వివాహేతర అనుమానాలతో భార్యను బ్యాట్‌తో కొట్టి హత్య చేసిన భర్త

చందానగర్ నవంబర్ 10:
సంగారెడ్డి జిల్లా అమీన్పూర్ పోలీస్‌స్టేషన్ పరిధిలో ఆదివారం ఉదయం జరిగిన దారుణ ఘటనతో ప్రాంతం ఒక్కసారిగా కలకలం రేగింది. వివాహేతర సంబంధం ఉందనే అనుమానంతో భర్త తన భార్యను కిరాతకంగా హత్యచేసిన కేసును పోలీసులు నమోదు చేశారు.

గుంటూరు జిల్లాకు చెందిన బ్రహ్మయ్య – క్రిష్ణవేణి(37) దంపతులు కొంతకాలంగా అమీన్పూర్ పట్టణంలోని కేఎస్ఆర్ నగర్‌లో నివాసం ఉంటున్నారు.

• క్రిష్ణవేణి కోహిర్ డీసీసీబీ బ్యాంకులో అసిస్టెంట్ మేనేజర్‌గా పనిచేస్తోంది.
• బ్రహ్మయ్య రియల్ ఎస్టేట్ వ్యాపారి.
• దంపతులకు ఇంటర్మీడియట్ చదివే పాప మరియు ఎనిమిదో తరగతి చదివే బాబు ఉన్నారు.

అనుమానాలు ::తగాదాలు;చివరికి దుర్ఘటన

కొన్నాళ్లుగా భార్యాభర్తలిద్దరికీ ఒకరిపై ఒకరికి అనుమానం పెరిగింది. అనుమానాల నేపథ్యంలో దంపతుల మధ్య తరచూ గొడవలు జరుగుతున్నాయి. ఈ మనస్పర్థలు ఆదివారం ఉదయం తీవ్రతరం అయ్యాయి. చిన్న గొడవ పెద్దదిగా మారి దాడి స్థాయికి చేరుకుంది.

క్రికెట్ బ్యాట్‌తో దాడి – వెంటనే మృతి

పోలీసుల వివరాల ప్రకారం, తీవ్ర కోపంతో బ్రహ్మయ్య ఇంట్లో ఉన్న క్రికెట్ బ్యాట్ తీసుకొని భార్య క్రిష్ణవేణి తలకు బలంగా కొట్టాడు. తీవ్రమైన గాయాల వల్ల ఆమె తక్షణమే అక్కడికక్కడే మృతి చెందినట్లు పోలీసులు తెలిపారు. ఘటన జరిగినప్పుడు పిల్లలు ఇంట్లో ఉన్నారా లేదా అన్నది ఇంకా స్పష్టత రాలేదు.

మృతురాలి తల్లి పోలీసులకు ఫిర్యాదు చేయడంతో కేసు నమోదు చేసి దర్యాప్తు ప్రారంభించారు. నిందితుడైన బ్రహ్మయ్య ఎక్కడ ఉన్నాడనే విషయంపై పోలీసులు గాలింపు ముమ్మరం చేశారు. పోస్టుమార్టం కోసం మృతదేహాన్ని ప్రభుత్వాసుపత్రికి తరలించారు.