అందెశ్రీ మరణానికి జగిత్యాల ప్రముఖుల నివాళి

 జగిత్యాల (రూరల్) నవంబర్ 10 (ప్రజా మంటలు):

తెలంగాణ రాష్ట్ర గీతం “జయ జయహే తెలంగాణ” రచయిత, ప్రముఖ కవి, తెలంగాణ ఉద్యమంలోని శక్తివంతమైన స్వరమైన డా. అందెశ్రీ గారి అకాల మరణం పట్ల తెలంగాణ నాయకులు, ప్రజాప్రతినిధులు గాఢంగా సంతాపం వ్యక్తం చేస్తున్నారు.

“తెలంగాణ సాహిత్య లోకానికి అందెశ్రీ అకాల మరణం తీరని లోటు. ఎంతోకాలంగా తెలంగాణ అభ్యున్నతికోసం సాహిత్య కృషి చేసిన ఆయన మరణం వ్యక్తిగతంగా నాకు ఎంతో నష్టం. వారి కుటుంబానికి ప్రగాఢ సానుభూతి తెలియజేస్తున్నాను” అని మాజీ మంత్రి రాజేశం గౌడ్ అన్నారు.

ఉద్యమానికి అండగా నిలిచి, ప్రజలతో మమేకమైన మనిషి

అందెశ్రీ కవిగా,గాయకునిగా తెలంగాణ ఉద్యమానికి అండగా నిలిచి, ఉద్యమసారథి లా ఎంతో కృషి చేసి, ప్రజలతో మమేకమై మెలిగిన మంచి మనిషని మాజీ మంత్రి కొప్పుల ఈశ్వర్ తన సంతాపం సందేశంలో పేర్కొన్నారు. ఆయన అకాల మృతి, తెలంగాణ సాహితీ లోకానికి కాకుండా, సామాన్య ప్రజలకు తీరని లోటని, ఆయన లేని లోటు కుటుంబానికి తీర్చలేనిదంటూ, కుటుంబ సభ్యులకు తన ప్రగాఢ సంతాపం తెలిపారు.

తెలంగాణ సాహిత్య వర్గాలు తీవ్ర సంతాపం

తెలంగాణ బీసీ కమిషన్ తొలి చైర్మన్ బి ఎస్ రాములు ఆయనతో ఉన్న జ్ఞాపకాలను నెమరువేసుకుంటూ, తెలంగాణలో ఈశతబ్దపు ప్రజాకవులలో అగ్రగణ్యుడని, ఆయన ఆలోచనలు, ఆచరణ తెలంగాణ సాహిత్యానికి చేసిన సేవలు మరువలేనివి అంటూ, ఆయన కుటుంబానికి సంతాపం తెలిపారు.

కరీంనగర్ శాసనమండలి సభ్యులు ఎల్. రమణ గారు స్పందిస్తూ…“డాక్టర్ అందెశ్రీ గారి మృతి తెలంగాణకు తీరని లోటు. ఆయన రచనలు, ఆయన గళం రాష్ట్ర ఉద్యమానికి ప్రాణం పోశాయి. ఆయన ఆత్మకు శాంతి చేకూరాలని భగవంతుడిని ప్రార్థిస్తున్నాను. కుటుంబ సభ్యులకు నా ప్రగాఢ సానుభూతి" అని పేర్కొన్నారు.

జగిత్యాల జిల్లా తొలి జెడ్పీ చైర్‌పర్సన్ దావ వసంత సురేష్ కూడా శోకాన్ని వ్యక్తం చేస్తూ…
“తెలంగాణ ప్రజల గుండెల్లో చెరగని ముద్ర వేసిన గొప్ప కళాకారుడు అందెశ్రీ ఇక లేరన్న వార్త ఎంతో బాధాకరం. ఉద్యమ సమయంలో ఆయన గళం ప్రజల్లో ఉత్సాహం నింపింది. ఆ స్వరం ఎప్పటికీ మరువలేము” అని అన్నారు.

తెలంగాణలోని ప్రతిభావంతులైన కళాకారులలో అందెశ్రీ  ప్రత్యేక స్థానం సంపాదించుకున్నారు. ఆయన రచనలు, ఆయన స్వరం, రాష్ట్ర ఉద్యమ జ్ఞాపకాలలో శాశ్వతంగా నిలిచిపోతాయని నేతలు పేర్కొన్నారు.