అనవసరంగా మా పేర్లు లాగుతున్నారు - మాకు సంబంధం లేదు - మంత్రులు పొంగులేటి - ఉత్తమ్ కుమార్

కొండా సురేఖ–OSD వివాదం: ఉత్తమ్ కుమార్ రెడ్డి, పొంగులేటి పేర్లు చర్చలోకి

హైదరాబాద్‌ అక్టోబర్ 16:

తెలంగాణ మంత్రి కొండా సురేఖ కార్యాలయంలో పనిచేస్తున్న ఆమె వ్యక్తిగత ఓఎస్‌డీ సుమంత్‌పై వచ్చిన బెదిరింపు, అవినీతి ఆరోపణలతో ప్రారంభమైన వివాదం ఇప్పుడు మంత్రివర్గ స్థాయికి చేరింది. డెక్కన్ సిమెంట్స్ కంపెనీ ప్రతినిధులను బెదిరించాడనే ఫిర్యాదుతో సుమంత్‌ను ప్రభుత్వంసస్పెండ్‌ చేయగా, అతనిపై పోలీసు విచారణ కొనసాగుతోంది. అయితే ఈ వ్యవహారంలో ఇద్దరు మంత్రుల పేర్లు – ఉత్తమ్‌కుమార్ రెడ్డి మరియు పొంగులేటి శ్రీనివాస్ రెడ్డి – వెలుగులోకి రావడంతో రాజకీయ వాతావరణం వేడెక్కింది.

కొండా సురేఖ కుమార్తె సుష్మిత మీడియా ముందు మాట్లాడుతూ, డెక్కన్ సిమెంట్స్ ఫైల్ వ్యవహారంలో మంత్రి ఉత్తమ్ కుమార్ రెడ్డి మరియు మంత్రి పొంగులేటి ప్రమేయం ఉందని సంచలన ఆరోపణలు చేశారు. “సమంత్‌ను ఫిర్యాదుల పేరుతో బలవంతంగా అరెస్ట్ చేయాలని ప్రయత్నించారు. మా అమ్మను మంత్రివర్గం నుండి తప్పించే కుట్ర జరుగుతోంది” అని ఆమె ఆరోపించారు. ఈ ఆరోపణలతో రాజకీయ చర్చలు ఊపందుకున్నాయి.

ఈ ఆరోపణలకు మంత్రి ఉత్తమ్ కుమార్ రెడ్డి తక్షణం స్పందిస్తూ, “నా ప్రమేయం ఏదీ లేదు. ఎవరి మీదా నేను ఫిర్యాదు చేయలేదు. సురేఖతో విభేదాలే లేవు” అని స్పష్టం చేశారు. అదే సమయంలో పొంగులేటి శ్రీనివాస్ రెడ్డి కూడా “తన పేరు అనవసరంగా లాగుతున్నారని” వ్యాఖ్యానించారు.

అధికార వర్గాల సమాచారం ప్రకారం, మంత్రుల మధ్య భూవ్యవహారాలు, పరిపాలనలో జోక్యం, స్థానిక నాయకత్వ పోటీలు వంటి అంశాల నేపథ్యంలో ఈ వివాదం మరింత విస్తరించినట్టు తెలుస్తోంది. సురేఖ అనుచరుల అరెస్టు, ఆమెకు వ్యతిరేకంగా జరుగుతున్న చర్యలు కూడా మంత్రివర్గంలోని అంతర్గత విభేదాలను బహిర్గతం చేశాయి.

ప్రస్తుతం ప్రభుత్వం విచారణ కొనసాగిస్తుండగా, సురేఖకు మద్దతుగా కొందరు ఎమ్మెల్యేలు బహిరంగంగా మాట్లాడడం గమనార్హం. ఈ సంఘటనతో కాంగ్రెస్ ప్రభుత్వంలో మంత్రుల మధ్య విభేదాలు స్పష్టమవుతుండగా, దీనిపై ముఖ్యమంత్రి కార్యాలయం తుది నిర్ణయం తీసుకునే అవకాశం ఉందని విశ్వసనీయ వర్గాలు చెబుతున్నాయి.