ఆన్లైన్ క్రెడిట్ కార్డ్ మోసాల పట్ల  ప్రజలు అప్రమత్తంగా ఉండాలి: జిల్లా ఎస్పీ  అశోక్ కుమార్ 

జగిత్యాల సెప్టెంబర్ 26 (ప్రజా మంటలు)
ఈ మధ్య కాలంలో ఆన్‌లైన్ క్రెడిట్ కార్డ్ మోసాలు విపరీతంగా పెరుగుతున్నాయి.గుర్తు తెలియని నంబర్ల నుండి వచ్చే ఫోన్ కాల్స్, సందేశాలు లేదా లింకులను నమ్మి ఎవ్వరూ తమ క్రెడిట్ కార్డ్ వివరాలు, ఓటీపీలు, పిన్ నంబర్లు చెప్పకూడదని ఎస్పీ సూచించారు.

RBL, ఆక్సిస్, హదఫక్ తదితర  ఆన్లైన్ క్రెడిట్ కార్డ్ మోసాలు ఎక్కువవుతున్న నేపథ్యంలో ప్రజలు మరింత జాగ్రత్తలు తీసుకోవాలని ఎస్పీ గారు విజ్ఞప్తి చేశారు.ప్రజలు జాగ్రత్తలు పాటించకపోతే పెద్ద మొత్తంలో ఆర్థిక నష్టం వాటిల్లే అవకాశం ఉందని, బ్యాంకులు ఎప్పుడూ ఫోన్ లేదా సందేశం ద్వారా వ్యక్తిగత వివరాలు అడగవు. అలాంటి కాల్స్ వస్తే వెంటనే కాల్‌ను డిస్కనెక్ట్ చేసి, 1930 హెల్ప్‌లైన్ నంబర్‌కి సమాచారం ఇవ్వాలని జిల్లా ఎస్పీ గారు సూచించారు.

అంతేకాకుండా, అధికారిక యాప్‌లు, వెబ్‌సైట్ల ద్వారానే బ్యాంకింగ్ లావాదేవీలు చేయాలి అని  అనుమానాస్పద లింకులు, ఫేక్ యాప్‌లకు దూరంగా ఉండాలని సూచించారు.

*సైబర్ మోసగాళ్లు ఉపయోగిస్తున్న పద్ధతులు*

    1 •    బ్యాంకు ఉద్యోగులమని చెప్పి ఫోన్ చేసి OTP, PIN, CVV అడగడం.
    2 •    క్రెడిట్ కార్డ్ లిమిట్ పెంచుతామని, లోన్ మంజూరు చేస్తామని చెప్పి వ్యక్తిగత వివరాలు అడగడం.
    3 •    SMS లేదా ఇమెయిల్ లో నకిలీ లింకులు పంపించి, వాటిలో క్లిక్ చేయగానే కార్డు వివరాలు దొంగిలించడం.
    4 •    ఈ-కామర్స్ వెబ్‌సైట్లు, నకిలీ యాప్‌లు ద్వారా డబ్బులు బదిలీ చేయించడం.

క్రెడిట్ కార్డు మోసాలను నివారించడానికి జాగ్రత్తలు

*కార్డు వివరాలను గోప్యంగా ఉంచండి:*  బ్యాంక్ ఉద్యోగులమని చెప్పి ఎవరైనా ఫోన్ చేసినా, ఈ-మెయిల్ పంపినా మీ క్రెడిట్ కార్డు నంబరు, సీవీవీ, పిన్ లేదా ఓటీపీ వంటి వివరాలను ఎప్పుడూ చెప్పవద్దు.

*లింకులను క్లిక్ చేయవద్దు:* ఎస్సెమ్మెస్, వాట్సాప్ లేదా ఈ-మెయిల్ ద్వారా వచ్చే అనుమానాస్పద లింకులను క్లిక్ చేయకండి.

*లావాదేవీల నోటిఫికేషన్లు:* మీ కార్డుతో జరిగే ప్రతి లావాదేవీకి నోటిఫికేషన్లు వచ్చేలా చూసుకోండి. అనుమానాస్పద లావాదేవీ కనిపిస్తే వెంటనే బ్యాంకుకు తెలియజేయండి.

*అప్రమత్తంగా ఉండండి:* ఆన్‌లైన్‌లో క్రెడిట్ కార్డుల కోసం అన్వేషించేటప్పుడు అప్రమత్తంగా ఉండాలి. నకిలీ వెబ్‌సైట్లు లేదా ఆఫర్ల పట్ల జాగ్రత్త వహించాలి.

*మోసానికి గురైతే ఏం చేయాలి:* మోసపోయినట్లు తెలిసిన వెంటనే బ్యాంకుకు ఫోన్ చేసి మీ క్రెడిట్ కార్డును బ్లాక్ చేయించండి.1930 నంబర్ కి కాల్ చేయండి లేదా  సైబర్ క్రైమ్ పోర్టల్ www.cybercrime.gov.in లో ఆన్‌లైన్‌లో ఫిర్యాదు చేయండి.