అమెరికా వ్యవసాయ రంగంలో కూలీల కొరత సమస్య

ట్రంప్ ప్రభుత్వం వలసదారులపై దాడుల తీవ్ర ప్రభావం

న్యూయార్క్ అక్టోబర్ 22:

అమెరికాలో వ్యవసాయ రంగం తీవ్రమైన కూలీల కొరతను ఎదుర్కొంటోంది. అధ్యక్షుడు డొనాల్డ్ ట్రంప్ ప్రభుత్వం చేపట్టిన వలసదారులపై దాడులు, దేశవ్యాప్తంగా రైతుల ఉత్పత్తి వ్యవస్థలను కుదిపేశాయి. అమెరికా కార్మిక శాఖ తాజాగా విడుదల చేసిన నివేదిక ప్రకారం, వలస నియంత్రణ చర్యల వల్ల ఆహార ఉత్పత్తి, ధరల స్థిరత్వం రెండూ ప్రమాదంలో పడ్డాయని హెచ్చరించింది.

అమెరికా వ్యవసాయ భవిష్యత్తు ఇప్పుడు వలస విధానాల మార్పుపై ఆధారపడి ఉందని నిపుణులు చెబుతున్నారు.

ఇడాహో రాష్ట్రంలోని Owyhee Produce అనే కుటుంబ ఆధారిత వ్యవసాయ సంస్థ ఈ సంక్షోభానికి చక్కని ఉదాహరణ. మూడవ తరం రైతు షే మేయర్స్ నిర్వహిస్తున్న ఈ ఫారంలో పంట కోత సీజన్‌లో సాధారణంగా 300 మంది కూలీలు పనిచేస్తారు. వారిలో సుమారు 80 మంది H-2A వీసా కూలీలు — వీరు మెక్సికో, దక్షిణాఫ్రికా వంటి దేశాల నుండి తాత్కాలికంగా వస్తారు.

మేయర్స్ ప్రకారం, ఈ కూలీలకు నివాసం, ప్రయాణం వంటి అన్ని సౌకర్యాలు వ్యవసాయ సంస్థే కల్పిస్తుంది. కానీ అమెరికాలో స్థానికంగా ఈ పనికి సిద్ధపడే వారు చాలా అరుదుగా ఉన్నారని ఆయన తెలిపారు. “ఇది కష్టం అయిన పని. గ్రామీణ ప్రాంతాల్లో ఇంతమంది కూలీలను కనుగొనడం అసాధ్యం,” అని ఆయన అన్నారు.

ఇక మెక్సికోకు చెందిన సీజనల్ వర్కర్ మౌరిసియో సాల్ చెబుతున్నాడు: “మేమంతా చట్టబద్ధమైన H-2A వీసాతో వస్తాం. అయినా కూడా ICE దాడుల భయంతో చాలామంది దరఖాస్తు చేయడానికే భయపడుతున్నారు,” అని ఆయన తెలిపాడు.

అమెరికన్ బిజినెస్ ఇమిగ్రేషన్ కోలీషన్ ప్రతినిధి జేమ్స్ ఓ’నీల్ హెచ్చరిస్తూ, “దేశవ్యాప్తంగా వ్యవసాయ కార్మికుల్లో 50–60 శాతం మంది అనధికార వలసదారులే. వీరిపై దాడులు కొనసాగితే ఆహార ధరలు భారీగా పెరుగుతాయి,” అని అన్నారు.