టీచర్ బూర్గుల సుమన పార్థివ దేహాం గాంధీకి అప్పగింత

వైద్య పరిశోధనల కోసం స్టూడెంట్స్ కు ఇచ్చిన ఫ్యామిలీ మెంబర్స్

సికింద్రాబాద్, అక్టోబర్ 22 (ప్రజామంటలు) :

హైదరాబాద్‌ రాష్ట్ర తొలి ముఖ్యమంత్రి బూర్గుల రామకృష్ణారావు సోదరుడు వేంకటేశ్వరరావు కుమార్తె, సంఘసేవకురాలు బూర్గుల సుమన (88) పార్ధివదేహాన్ని  సికింద్రాబాద్‌ గాంధీ మెడికల్‌ కళాశాలకు ఆమె కుటుంబసభ్యులు బుధవారం అప్పగించారు.

ప్రముఖ స్వాతంత్య్ర సమరయోధుడు బూర్గుల నర్సింగరావు సోదరి అయిన సుమన హైదరాబాద్‌లోని ఆటమిక్‌ ఎనర్జీ సెంట్రల్‌ స్కూలులో టీచర్‌గా విధులు నిర్వహించి పదవీవిరమణ పొందారు. 2011 నుంచి 2021 వరకు రంగారెడ్డిజిల్లా షాద్‌నగర్‌ ఫరూఖ్‌నగర్‌ మండలం బూర్గుల గ్రామ సర్పంచ్‌గా, ఎంపీటీసీగా పదవీ బాధ్యతలు చేపట్టారు. ప్రగతి వెల్ఫేర్‌ అసోషియేషన్‌ను ఏర్పాటు చేసి పలు సామాజిక సేవ కార్యక్రమాలు నిర్వహించారు.

మరణించిన తర్వాత కూడా తన శరీరం ఉపయోగపడాలనే ధ్యేయంతో పార్ధివదేహాన్ని గాంధీ మెడికల్‌ కాలేజీకి అప్పగించాలని వీలునామా రాసారు. వృద్ధాప్య రుగ్మతలతో బాధపడుతు కొంత కాలంగా నగరంలోని ఓ ప్రైవేటు వైద్యశాలలో చికిత్స పొందుతున్న ఆమె ఈనెల 21వ న మృతి చెందారు.ఆమె చివరి కోరిక మేరకు భౌతికకాయాన్ని  కుటుంబసభ్యులు మెడికల్‌ కాలేజీకి అప్పగించారు. బూర్గుల సుమన పార్ధివదేహానికి ఎంబామింగ్‌ (రసాయనాల పూత) చేసి భధ్రపరుస్తామని తెలిపారు.

వైద్యవిద్యార్థుల పరిశోధనల కోసం వినియోగిస్తామని గాంధీ మెడికల్‌ కాలేజీ ప్రిన్సిపాల్‌ ప్రొఫెసర్‌ ఇందిర, అనాటమీ హెచ్‌ఓడీ  ప్రొఫెసర్ సుధారాణి, ప్రొఫెసర్‌ సుధాకర్‌ బాబు  తెలిపారు. సుమన కుటుంబసభ్యులు ప్రదీప్, అంభిక, మాధురిక, సాగరికమాలిని, ప్రొఫెసర్‌ రమ, డాక్టర్‌ అరుణ, అనుపమ తదితరులు పాల్గొన్నారు.