జగిత్యాల మెడికల్ కళాశాల భవనాలు ఎప్పుడు పూర్తి చేస్తారు?

జగిత్యాల, అక్టోబర్ 08 (ప్రజా మంటలు):

విద్య, వైద్యం ప్రతి పౌరుడి ప్రాథమిక హక్కులని, వాటిని అందించడం ప్రభుత్వ బాధ్యత అని మాజీ మంత్రి, బీఆర్‌ఎస్ రాష్ట్ర ప్రధాన కార్యదర్శి తాటిపర్తి జీవన్‌రెడ్డి అన్నారు. జగిత్యాల పట్టణంలోని తెలంగాణ భవన్‌లో జిల్లా పరిషత్ తొలి చైర్‌పర్సన్ దావా వసంత సురేష్, బీఆర్‌ఎస్ నాయకులతో కలిసి నిర్వహించిన విలేకరుల సమావేశంలో ఆయన మాట్లాడారు.

తెలంగాణ రాష్ట్ర ఏర్పాటు అనంతరం కేసీఆర్ విద్య, వైద్య రంగాలకు ప్రాధాన్యత ఇచ్చారని జీవన్‌రెడ్డి పేర్కొన్నారు. ఉమ్మడి రాష్ట్రంలో 261 గురుకులాలు ఉండగా, తెలంగాణలో అదనంగా 652 గురుకులాలను ఏర్పాటు చేశారని తెలిపారు. ప్రతి జిల్లాకు మెడికల్ కళాశాల ఏర్పాటు చేయాలనే ఉద్దేశంతో జిల్లాల సంఖ్యను పెంచి వైద్య విద్యకు అవకాశాలు కల్పించారని అన్నారు.

జగిత్యాల జిల్లా ఏర్పడి పదేళ్లు పూర్తయినా మెడికల్ కళాశాల భవన నిర్మాణాలు, వసతి, ల్యాబ్ తదితర సదుపాయాలు పూర్తికాకపోవడం బాధాకరమన్నారు. జగిత్యాలతో పాటు మంజూరైన ఏడు మెడికల్ కళాశాలల్లో మిగతా కళాశాలల భవనాలు పూర్తయి వసతులు అందుబాటులోకి వచ్చాయని, జగిత్యాల కళాశాల విషయంలో మాత్రం జాప్యం జరుగుతోందని ఆరోపించారు.

“ఎమ్మెల్యే ప్రతిపక్షంలో ఉంటే అభివృద్ధి జరగదని చెప్పి పార్టీ మారారు. ఇప్పుడు అధికారంలో ఉండి మెడికల్ కళాశాల భవనాలు ఎందుకు పూర్తి చేయించలేకపోతున్నారు? డాక్టర్ అయినందుకా.. పార్టీ మారినందుకా?” అని జీవన్‌రెడ్డి ప్రశ్నించారు. జగిత్యాలలో ప్రస్తుతం జరుగుతున్న పలు అభివృద్ధి పనులకు 2023లో బీఆర్‌ఎస్ ప్రభుత్వ హయాంలోనే నిధులు మంజూరయ్యాయని తెలిపారు.

మెడికల్ కళాశాల విద్యార్థులు 24 గంటలుగా వసతుల కోసం నిరసన వ్యక్తం చేస్తున్నప్పటికీ ఎమ్మెల్యే, కలెక్టర్ స్పందించకపోవడం సరికాదన్నారు. విద్యార్థుల సమస్యలపై కలెక్టర్ తక్షణమే వారితో మాట్లాడి పరిష్కారానికి చర్యలు తీసుకోవాలని డిమాండ్ చేశారు.

మెడికల్ కళాశాలలో పోలీసులు కార్డన్‌ అండ్‌ సెర్చ్ పేరుతో ఆంక్షలు విధిస్తున్నారని, కళాశాలకు వెళ్లేందుకు కూడా అనుమతించడం లేదని జీవన్‌రెడ్డి ఆరోపించారు. విద్యార్థుల సమస్యలు పరిష్కరించాల్సిన బాధ్యత జిల్లా మంత్రి, కలెక్టర్‌పై ఉందన్నారు. డిసెంబర్‌లోగా భవన నిర్మాణ పనులు పూర్తి చేసి, 2027 నూతన సంవత్సరానికి విద్యార్థులకు అందించాలని డిమాండ్ చేశారు.

జగిత్యాల నియోజకవర్గంలో గతంలో తాగునీటి కోసం ప్రతి మండలానికి రూ.4 కోట్ల చొప్పున నిధులు మంజూరు చేయించినట్లు జీవన్‌రెడ్డి తెలిపారు. జగన్నాథ్‌పూర్ నుంచి బోర్నపల్లికి రూ.18 కోట్లు మంజూరు చేయించామని, డబుల్ బెడ్‌రూమ్ ఇళ్లలో వసతుల కల్పనకు కూడా నిధుల కోసం కృషి చేశామని చెప్పారు. ప్రస్తుతం జగిత్యాలలో జరుగుతున్న పలు పనులు కేటీఆర్ మంత్రిగా ఉన్న సమయంలో బీఆర్‌ఎస్ ప్రభుత్వం మంజూరు చేసిన నిధులతోనే జరుగుతున్నాయని అన్నారు.

మెడికల్ కళాశాల విద్యార్థుల ఆందోళనకు బీఆర్‌ఎస్ తరఫున సంఘీభావం ప్రకటిస్తున్నామని, తక్షణమే వారి సమస్యలు పరిష్కరించకపోతే పార్టీ ఆధ్వర్యంలో ప్రత్యక్ష నిరసన కార్యక్రమాలు చేపడతామని జీవన్‌రెడ్డి హెచ్చరించారు.

ఈ సమావేశంలో జిల్లా పరిషత్ వైస్ చైర్మన్ హరిచరణ్‌రావు, అయిల్నేని వెంకటేశ్వరరావు, మున్నా, వొళ్లం మల్లేశం, పత్తిరెడ్డి మహిపాల్‌రెడ్డి, శీలం ప్రవీణ్, దేవేందర్ నాయక్, రాగుల ప్రదీప్, తాటిపర్తి దేవేందర్‌రెడ్డి, కళ్లేపల్లి దుర్గయ్య, పుప్పాల అశోక్, ధర రమేష్‌బాబు, నక్క జీవన్, శీలం సురేందర్, ప్రవీణ్‌కుమార్, గాజుల శ్రీనివాస్, ప్రణయ్, వెంకట్‌రెడ్డి, అభి, మామిడిపల్లి మహిపాల్ తదితరులు పాల్గొన్నారు.