జగిత్యాల మెడికల్ కాలేజీ .విద్యార్థుల ఆందోళన

మౌలిక వసతుల కల్పనలో జాప్యం, ఎన్‌ఎంసీ నిబంధనల ఉల్లంఘనపై నిరసన

జగిత్యాల, అక్టోబర్ 7 (ప్రజా మంటలు):

జగిత్యాల ప్రభుత్వ వైద్య కళాశాల (జీఎంసీ)లో మౌలిక వసతుల కల్పనలో తీవ్ర జాప్యం, విద్యార్థులకు అవసరమైన సౌకర్యాల కొరత, జాతీయ వైద్య కమిషన్ (ఎన్‌ఎంసీ) నిబంధనల అమలులో లోపాలను నిరసిస్తూ వైద్య విద్యార్థులు బుధవారం నుంచి నిరవధిక శాంతియుత ఆందోళనకు సిద్ధమయ్యారు.

విద్యార్థుల ప్రకారం.. కళాశాల శాశ్వత భవనాలు, వసతి గృహాల నిర్మాణానికి శంకుస్థాపన జరిగి దాదాపు నాలుగేళ్లు కావస్తున్నా పనులు పూర్తికాలేదు. ప్రాంగణంలో రహదారులు, డ్రైనేజీ, క్రీడా సౌకర్యాలు వంటి ప్రాథమిక వసతులు కూడా పూర్తిస్థాయిలో అందుబాటులోకి రాలేదని వారు పేర్కొన్నారు. 2022లో ప్రారంభమైన ఇతర ప్రభుత్వ వైద్య కళాశాలలు ఇప్పటికే పూర్తిస్థాయి భవనాల్లోకి మారినప్పటికీ, జగిత్యాల వైద్య కళాశాల విద్యార్థులు ఇప్పటికీ తాత్కాలిక భవనాల్లోనే విద్యను కొనసాగిస్తున్నారని తెలిపారు.

మూడు లెక్చర్‌ హాళ్లు.. ఐదు బ్యాచ్‌లు

కొత్త బ్యాచ్‌ చేరితే ఐదు బ్యాచ్‌ల విద్యార్థులు కేవలం మూడు తాత్కాలిక లెక్చర్‌ హాళ్లు, మూడు ప్రయోగశాలలను పంచుకోవాల్సి వస్తుందని విద్యార్థులు ఆవేదన వ్యక్తం చేశారు. హాస్టళ్లలో ఒక్కో గదిలో ఆరుగురి నుంచి ఎనిమిది మంది వరకు ఉంటున్నారని, ముఖ్యంగా విద్యార్థినులకు చదువుకునేందుకు అవసరమైన రీడింగ్‌ రూమ్‌ సౌకర్యం కూడా లేదని తెలిపారు.

కళాశాల బస్సులు లేక ఫీల్డ్‌ శిక్షణకు దూరం

కళాశాలకు ప్రత్యేక రవాణా సౌకర్యం లేకపోవడంతో వైద్య విద్యలో తప్పనిసరి అయిన ఫ్యామిలీ అడాప్షన్‌ ప్రోగ్రామ్‌ (ఎఫ్‌ఏపీ), గ్రామీణ/పట్టణ ఆరోగ్య శిక్షణ కేంద్రాల పోస్టింగ్‌లు, వైద్య శిబిరాలు వంటి కార్యక్రమాల్లో గత మూడేళ్లుగా ఏ బ్యాచ్‌ విద్యార్థులు కూడా పూర్తిస్థాయిలో పాల్గొనలేకపోయారని వారు తెలిపారు. ఇది ఎన్‌ఎంసీ నిర్దేశించిన విద్యా ప్రమాణాలకు విరుద్ధమని విద్యార్థులు ఆరోపించారు.

డిమాండ్లు ఇవే..

తమ సమస్యలను పరిష్కరించాలని గత రెండున్నరేళ్లుగా జగిత్యాల ఎమ్మెల్యే, జిల్లా కలెక్టర్‌, ఆర్‌అండ్‌బీ అధికారులు, నిర్మాణ సంస్థల ప్రతినిధులకు పలుమార్లు విజ్ఞప్తి చేసినా ఫలితం లేకపోయిందని విద్యార్థులు పేర్కొన్నారు.

విద్యార్థులు ప్రధానంగా అక్టోబర్‌ చివరి నాటికి పూర్తయిన హాస్టళ్లను అప్పగించడం, డిసెంబర్‌ నాటికి శాశ్వత కళాశాల భవనాన్ని పూర్తి చేయడం, విభాగాల వారీగా పూర్తిస్థాయి ప్రయోగశాలలు ఏర్పాటు చేయడం, వెంటనే కళాశాల బస్సులను ఏర్పాటు చేయడం, అంతర్గత రహదారులు-డ్రైనేజీ-క్రీడా మైదానాలను అభివృద్ధి చేయడం వంటి డిమాండ్లను ప్రభుత్వం ముందుంచారు.

తమ ఆందోళన పూర్తిగా శాంతియుతంగా, క్రమశిక్షణతో కొనసాగుతుందని, విద్యార్థులకు హామీ ఇచ్చిన ప్రాథమిక విద్యా, వసతి సౌకర్యాలను కల్పించడమే తమ లక్ష్యమని విద్యార్థులు స్పష్టం చేశారు.