ఓమన్‌ నుంచి యూఏఈలోకి చొరబాటు.. ఆరు నెలల జైలు, రూ.39 లక్షల జరిమానా

 జరిమానా మాఫీ చేయించి,  క్షమాభిక్ష ప్రసాదించాలని సీఎం రేవంత్‌రెడ్డికి కుటుంబ సభ్యుల విజ్ఞప్తి

జగిత్యాల, అక్టోబర్ 5 (ప్రజా మంటలు):
ఉపాధి కోసం ఓమన్‌ వెళ్లి, అక్కడి నుంచి యూఏఈలోకి అక్రమంగా ప్రవేశించిన జగిత్యాల జిల్లా వాసి ఏగుర్ల మల్లేశం ప్రస్తుతం దుబాయి జైలులో చిక్కుకుపోయారు. కోర్టు విధించిన ఆరు నెలల జైలు శిక్ష పూర్తయినా.. సుమారు రూ.39 లక్షల జరిమానా చెల్లించలేక జైలులోనే కొనసాగుతున్నట్లు తెలంగాణ ప్రభుత్వ ఎన్నారై అడ్వయిజరీ కమిటీ వైస్‌ చైర్మన్ మంద భీంరెడ్డి తెలిపారు.

జగిత్యాల జిల్లా బీమారం మండలం మోత్కురావుపేటకు చెందిన ఏగుర్ల మల్లేశం 2018లో ఉపాధి కోసం ఓమన్‌లోని మస్కట్‌కు వెళ్లారు. గతంలో దుబాయిలో పనిచేసిన ఆయనకు యూఏఈలో ప్రవేశ నిషేధం ఉండటంతో, కొందరి సూచనల మేరకు ఓమన్‌ నుంచి భూమార్గంలో యూఏఈలోకి ప్రవేశించినట్లు సమాచారం.

ఎడారి మార్గంలో కొంతదూరం కారులో, మరికొంత దూరం కాలినడకన ప్రయాణించి సరిహద్దు దాటినట్లు తెలుస్తోంది. ఈ విధంగా సరిహద్దులు దాటే ప్రయత్నాల్లో ప్రమాదాలకు గురై పలువురు ప్రాణాలు కోల్పోయిన ఘటనలు కూడా ఉన్నాయని కుటుంబ సభ్యులు తెలిపారు. మల్లేశం మాత్రం దుబాయిలో సుమారు ఎనిమిదేళ్ల పాటు అక్రమంగా నివసించినట్లు సమాచారం.

ఈ ఏడాది మార్చి 8న జరిగిన తనిఖీల్లో మల్లేశం అధికారులకు పట్టుబడ్డారు. అనంతరం దుబాయి కోర్టు ఆరు నెలల జైలు శిక్షతో పాటు లక్షా 50 వేల యూఏఈ దిర్హంల జరిమానా విధించింది. జరిమానా భారత కరెన్సీలో సుమారు రూ.39 లక్షలు ఉంటుందని కుటుంబ సభ్యులు తెలిపారు. శిక్ష పూర్తయిన అనంతరం దేశ బహిష్కరణ (డిపోర్టేషన్)కు కూడా ఆదేశాలు జారీ చేసినట్లు సమాచారం.

అయితే జరిమానా చెల్లించలేకపోవడంతో మల్లేశం జైలు నుంచి విడుదల కాలేదు. దీంతో ఆయన భార్య లత, తల్లి బచ్చవ్వ, గ్రామ సర్పంచ్ ఎనుగుల లచ్చయ్య, గ్రామ ప్రముఖుడు బూమల్ల మహేష్ ఇటీవల ‘సీఎం ప్రవాసీ ప్రజావాణి’లో ముఖ్యమంత్రి ఏ. రేవంత్‌రెడ్డికి వినతిపత్రం సమర్పించారు. జరిమానా మాఫీ చేయించి, క్షమాభిక్ష ద్వారా మల్లేశాన్ని విడుదల చేసి స్వదేశానికి తీసుకురావాలని వారు కోరారు.

కుటుంబం విజ్ఞప్తిపై తెలంగాణ ప్రభుత్వం స్పందించి దుబాయిలోని భారత కాన్సులేట్ ద్వారా మల్లేశం కేసుకు సంబంధించిన వివరాలను సేకరించినట్లు భీంరెడ్డి తెలిపారు. జూలై 23న దుబాయిలోని అవీర్ జైలును భారత కాన్సులేట్ అధికారులు సందర్శించి మల్లేశాన్ని కలుసుకున్నారని చెప్పారు.

జైలు అధికారులు తెలిపిన వివరాల ప్రకారం.. ఫోర్జరీ (నకిలీ పత్రాలు) కేసులో మల్లేశానికి ఆరు నెలల జైలు శిక్ష, లక్షా 50 వేల యూఏఈ దిర్హంల జరిమానా, అనంతరం దేశ బహిష్కరణ విధించినట్లు భారత కాన్సులేట్ కాన్సులర్ విభాగం అసిస్టెంట్ సెక్షన్ ఆఫీసర్ ఆశిష్ శర్మ తెలంగాణ ప్రభుత్వ సాధారణ పరిపాలన శాఖ ఎన్నారై విభాగానికి ఈమెయిల్ ద్వారా సమాచారం అందించినట్లు భీంరెడ్డి పేర్కొన్నారు.

ఈ కేసు వివరాలను ఢిల్లీలోని విదేశీ వ్యవహారాల మంత్రిత్వ శాఖ అండర్‌ సెక్రటరీ బిభూతి నాథ్ పాండే, కేంద్ర హోంశాఖ సహాయ మంత్రి బండి సంజయ్‌కు కూడా లేఖ ద్వారా తెలియజేసినట్లు ఆయన తెలిపారు.

ప్రస్తుతం మల్లేశం శిక్షా కాలం పూర్తయినప్పటికీ జరిమానా చెల్లించలేక జైలులో కొనసాగుతున్న నేపథ్యంలో, జరిమానా మాఫీ, క్షమాభిక్ష లేదా అందుబాటులో ఉన్న ఇతర న్యాయపరమైన మార్గాల ద్వారా ఆయనను విడుదల చేసి స్వదేశానికి తీసుకురావడంపై న్యాయ నిపుణులతో సంప్రదింపులు జరుపుతున్నట్లు భీంరెడ్డి వెల్లడించారు.