సారంగాపూర్‌లో అభివృద్ధి పనులకు ఎమ్మెల్యే భూమిపూజ

సారంగాపూర్ అక్టొబర్ 06 (ప్రజా మంటలు):

మండల కేంద్రంలో పలు అభివృద్ధి పనులకు జగిత్యాల ఎమ్మెల్యే డా. సంజయ్ కుమార్ భూమిపూజ చేశారు. జాగృతి మహిళా సమాఖ్య భవన నిర్మాణానికి రూ.10 లక్షలు, సీసీ రోడ్డు నిర్మాణానికి రూ.10 లక్షలు, రామాలయం వద్ద మరుగుదొడ్ల నిర్మాణానికి రూ.3 లక్షల నిధులతో చేపట్టనున్న పనులకు శంకుస్థాపన చేశారు. అనంతరం సారంగాపూర్, నాయకపుగూడెంలో నూతనంగా ఏర్పాటు చేసిన డీటీఆర్‌లను ప్రారంభించారు.

మండల కేంద్రంలోని రైతు వేదికలో జరిగిన కార్యక్రమంలో 13 మంది లబ్ధిదారులకు కల్యాణలక్ష్మి పథకం కింద మంజూరైన రూ.13 లక్షల చెక్కులను, 28 మందికి సీఎంఆర్‌ఎఫ్ ద్వారా మంజూరైన రూ.10.70 లక్షల చెక్కులను ఎమ్మెల్యే పంపిణీ చేశారు.

ఈ సందర్భంగా ఎమ్మెల్యే మాట్లాడుతూ గ్రామాల్లో మౌలిక వసతుల కల్పనకు ప్రభుత్వం ప్రాధాన్యత ఇస్తోందన్నారు. రహదారులు, విద్యుత్, మహిళా సంఘాలకు అవసరమైన సదుపాయాలను మెరుగుపరుస్తున్నామని తెలిపారు. గత ప్రభుత్వ హయాంలో చేపట్టిన అభివృద్ధి పనులకు సంబంధించిన బిల్లులను కూడా చెల్లిస్తున్నామని చెప్పారు.

రోళ్లవాగు ప్రాజెక్టుకు రూ.40 కోట్లు మంజూరు చేశామని, అటవీ అనుమతుల కోసం కృషి చేస్తున్నామని తెలిపారు. బీర్పూర్ ఘాట్ రోడ్డును డబుల్ రోడ్డుగా అభివృద్ధి చేసేందుకు మంజూరు లభించిందని, అటవీ అనుమతులు రావాల్సి ఉందన్నారు.

ఇందిరమ్మ ఇళ్ల మంజూరుతో గ్రామాల్లో పండగ వాతావరణం నెలకొందని ఎమ్మెల్యే పేర్కొన్నారు. రైతు భరోసా, రుణమాఫీ, సన్నబియ్యం, ఉచిత విద్యుత్, మహిళలకు ఉచిత బస్సు ప్రయాణం వంటి సంక్షేమ కార్యక్రమాలను ప్రభుత్వం అమలు చేస్తోందన్నారు.

ఇటీవల కురిసిన అధిక వర్షాల నేపథ్యంలో ప్రకృతి వైపరీత్యాలకు ఎవరూ అతీతులు కారని, రైతులు ఆరుతడి పంటల సాగు వైపు దృష్టి సారించాలని సూచించారు. వర్షపాతం, నీటి వనరుల పరిస్థితుల కారణంగా ప్రాజెక్టుల్లో నీటి లభ్యత, విద్యుత్ ఉత్పత్తిపై ప్రభావం పడుతోందన్నారు.

జగిత్యాలలో మెడికల్ కాలేజీతో పాటు పెద్ద ప్రభుత్వ ఆసుపత్రి నిర్మాణం చేపడుతున్నామని తెలిపారు. నాణ్యమైన విద్య, వైద్యం అందించేందుకు ప్రభుత్వం చర్యలు తీసుకుంటోందన్నారు. ప్రభుత్వ మహిళా డిగ్రీ కళాశాలలో కొత్త విద్యా కోర్సులు ప్రవేశపెట్టామని, విద్యార్థులు వాటిని సద్వినియోగం చేసుకుని ఉద్యోగ అవకాశాలను పొందాలని సూచించారు. ఏటీసీ కేంద్రం ఏర్పాటుతో యువతకు ఉపాధి అవకాశాలు పెరుగుతాయని చెప్పారు.

జగిత్యాల నియోజకవర్గంలో సీఎంఆర్‌ఎఫ్ చెక్కుల పంపిణీ కొనసాగుతోందని, ప్రజా సంక్షేమం, అభివృద్ధి కార్యక్రమాలను సమన్వయంతో ముందుకు తీసుకెళ్లి సారంగాపూర్ మండలాన్ని అన్ని రంగాల్లో అభివృద్ధి చేసేందుకు కృషి చేస్తామని ఎమ్మెల్యే తెలిపారు.

కార్యక్రమంలో సర్పంచులు అరుణ శేఖర్, పుష్ప నాథ్, మండల సర్పంచుల ఫోరం అధ్యక్షుడు సొల్లు సురేందర్, పీఏసీఎస్ చైర్మన్లు మల్లారెడ్డి, నరసింహారెడ్డి, వైస్ చైర్మన్ బాపిరాజు, ఎంపీడీవో సలీం, డిప్యూటీ తహసీల్దార్ సుమతి, మండల కాంగ్రెస్ అధ్యక్షుడు మనోహర్‌రెడ్డి, మాజీ ఎంపీపీ కోల శ్రీనివాస్, మాజీ సర్పంచ్ రాజేందర్‌రెడ్డి, సర్పంచులు, ఉపసర్పంచులు, అధికారులు, నాయకులు, మహిళలు తదితరులు పాల్గొన్నారు.