సిరిసిల్లలో తప్పు కంటికి ఆపరేషన్‌పై టీజీహెచ్‌ఆర్‌సీ సుమోటో

హైదరాబాద్, అక్టోబర్  06 (ప్రజా మంటలు): .

రాజన్న సిరిసిల్ల జిల్లాలో ఓ వృద్ధురాలికి చేయాల్సిన కంటికి బదులుగా మరో కంటికి శస్త్రచికిత్స చేసినట్లు వచ్చిన వార్తలపై తెలంగాణ మానవ హక్కుల కమిషన్ (టీజీహెచ్‌ఆర్‌సీ) సుమోటోగా కేసు స్వీకరించింది

సిరిసిల్లకు చెందిన కొమ్ము వెంకమ్మకు ఎడమ కంటికి బదులుగా కుడి కంటికి ఆపరేషన్ చేసినట్లు వచ్చిన కథనాలపై స్పందించిన కమిషన్.. ఆరోపణలు నిజమైతే వైద్య నిర్లక్ష్యం, రోగి భద్రత, శస్త్రచికిత్సకు ముందు పొందిన సమ్మతి వంటి అంశాలపై తీవ్రమైన ఆందోళనలు తలెత్తుతాయని పేర్కొంది.

ఈ ఘటనపై రాజన్న సిరిసిల్ల జిల్లా DM&HO నుంచి సమగ్ర నివేదిక కోరింది. వైద్య రికార్డులు, చేయాల్సిన మరియు చేసిన శస్త్రచికిత్స వివరాలు, రోగి లేదా కుటుంబ సభ్యుల నుంచి తీసుకున్న సమ్మతి, ప్రస్తుత ఆరోగ్య పరిస్థితి, ఘటనపై నిర్వహించిన విచారణ వివరాలను నివేదికలో పొందుపరచాలని ఆదేశించింది.

ఈ కేసును నవంబర్ 6న ఉదయం 11 గంటలకు విచారణకు ఉంచింది.

12 ఏళ్లుగా పెన్షన్ బకాయిలా? మూడు వారాల్లో చెల్లించాలి: టీజీహెచ్‌ఆర్‌సీ

హైదరాబాద్: NIMSలో అనస్థీషియాలజీ విభాగం రిటైర్డ్ ప్రొఫెసర్ డాక్టర్ మంత శ్రీనివాస్కు దాదాపు 12 ఏళ్లుగా పెన్షన్ ప్రయోజనాలు చెల్లించకపోవడంపై తెలంగాణ మానవ హక్కుల కమిషన్ (TGHRC) తీవ్ర అసంతృప్తి వ్యక్తం చేసింది.

డాక్టర్ శ్రీనివాస్ 2014 నవంబర్ 13న VRS తీసుకున్నారని, పెన్షన్ ప్రయోజనాలు విడుదల చేయాలని ప్రభుత్వం 2023 అక్టోబర్‌లోనే ఆదేశాలు జారీ చేసినప్పటికీ ఇప్పటివరకు చెల్లింపులు జరగలేదని కమిషన్ పేర్కొంది.

పెన్షన్ ఉద్యోగి సేవల ద్వారా సంపాదించుకున్న హక్కు అని, వృద్ధాప్యంలో ఆర్థిక భద్రతతో పాటు గౌరవప్రదమైన జీవనానికి అది అవసరమని స్పష్టం చేసింది. ఇంతకాలం పెన్షన్ ప్రయోజనాలను పెండింగ్‌లో ఉంచడంపై NIMS అధికారుల తీరును తప్పుబట్టింది.

మూడు వారాల్లోగా డాక్టర్ శ్రీనివాస్‌కు రావాల్సిన మొత్తం పెన్షన్ ప్రయోజనాలను విడుదల చేసేలా NIMS డైరెక్టర్ వ్యక్తిగతంగా చర్యలు తీసుకోవాలని ఆదేశించింది. తీసుకున్న చర్యలపై నివేదికను కమిషన్‌కు సమర్పించాలని సూచించింది.

గడువులోగా ఆదేశాలను అమలు చేయకపోతే NIMS డైరెక్టర్ స్వయంగా కమిషన్ ఎదుట హాజరై, ఆలస్యానికి గల కారణాలను వివరించాల్సి ఉంటుందని హెచ్చరించింది.