‘నాన్నా.. ఇక మీరు ఎవరికీ డబ్బులు ఇవ్వాల్సిన అవసరం లేదు’

కుటుంబ కలహాలు.. చిన్నారి వైద్య ఖర్చులు.. అప్పుల భారం.. చివరకు 43వ అంతస్తు నుంచి దూకిన యువ ఇంజినీర్‌

నోయిడా అక్టొబర: 05

చేతిలో మంచి ఉద్యోగం.. కళ్లముందు భవిష్యత్తుపై ఎన్నో ఆశలు.. తల్లిదండ్రులకు ఏకైక కుమారుడు.. కానీ జీవితంలో ఎదురైన వరుస సమస్యలు ఆ యువకుడిని తీవ్రంగా కుంగదీశాయి. చివరకు తల్లిదండ్రులకు తీరని శోకాన్ని మిగిల్చి బలవన్మరణానికి పాల్పడ్డాడు సాఫ్ట్‌వేర్‌ ఇంజినీర్‌ సంభవ్‌ జైన్‌.

గురుగ్రామ్‌లోని మానేసర్‌కు చెందిన 28 ఏళ్ల సంభవ్‌ జైన్‌ నోయిడాలోని సూపర్‌నోవా భవనంలో 43వ అంతస్తు నుంచి దూకి ప్రాణాలు తీసుకున్న ఘటన కలకలం రేపింది. కుటుంబ వివాదం, తన కుమారుడి అనారోగ్యానికి అయిన భారీ వైద్య ఖర్చులు, అప్పులు, విడాకుల అనంతరం ఎదురైన ఆర్థిక బాధ్యతలు.. ఇలా పలు అంశాలు అతడిపై తీవ్ర ఒత్తిడిని పెంచినట్లు పోలీసుల ప్రాథమిక దర్యాప్తులో వెల్లడైంది.

సంభవ్‌ కుమారుడు నెలలు నిండకముందే జన్మించడంతో చిన్నారి వైద్యం కోసం కుటుంబం భారీగా ఖర్చు చేసినట్లు సమాచారం. వైద్య ఖర్చులు, అప్పులు ఒకవైపు.. మరోవైపు భార్యతో ఏర్పడిన విభేదాలు, విడాకుల వ్యవహారం అతడిని మరింత ఆందోళనకు గురిచేశాయి. పోలీసులు చెబుతున్న వివరాల ప్రకారం, విడాకుల సెటిల్‌మెంట్‌లో సుమారు రూ.15 లక్షలు చెల్లించాల్సి ఉండగా, అందులో కొంత మొత్తం ఇప్పటికే చెల్లించారు. సోషల్‌ మీడియాలో ప్రచారమైన రూ.3 కోట్ల భరణం విషయాన్ని పోలీసులు ఖండించారు.

అయితే ఈ సమస్యలన్నింటికంటే మించి.. తండ్రితో సంభవ్‌ జరిపిన చివరి సంభాషణ ఇప్పుడు కుటుంబ సభ్యుల గుండెలను పిండేస్తోంది. తనను ఇంటికి తిరిగి రావాలని తండ్రి కోరుతుండగా, సంభవ్‌ తన ఆర్థిక ఇబ్బందుల గురించి చెప్పినట్లు పోలీసులు తెలిపారు. చివరకు తన కుమారుడి గురించి ఆందోళన వ్యక్తం చేసినట్లు కూడా సమాచారం.

“నాన్నా.. ఇక మీరు ఎవరికీ డబ్బులు ఇవ్వాల్సిన అవసరం లేదు” అన్న అతడి చివరి మాటలు ఇప్పుడు తండ్రికి కన్నీళ్లను మిగిల్చాయి. తనను కాపాడాలని తండ్రి ప్రయత్నించినా.. అప్పటికే తీవ్ర నిరాశలో ఉన్న సంభవ్‌ తీసుకున్న నిర్ణయం ఓ కుటుంబాన్ని విషాదంలోకి నెట్టింది.

ఘటనకు ముందు కూడా సంభవ్‌ తన తండ్రితో తన పరిస్థితి గురించి మాట్లాడినట్లు పోలీసులు తెలిపారు. అతడి మొబైల్‌లో ఓ వీడియో కూడా లభించిందని, అందులో తన ఆర్థిక ఇబ్బందుల గురించి ప్రస్తావించినట్లు పోలీసులు చెబుతున్నారు. కేసులో కుటుంబ పరిస్థితులు, అప్పులు, చిన్నారి వైద్య ఖర్చులు, విడాకుల వివాదం తదితర అంశాలపై దర్యాప్తు కొనసాగుతోంది.

తల్లిదండ్రులకు ఏకైక కుమారుడు.. ఒడిలో ఆడాల్సిన చిన్నారి.. భవిష్యత్తుపై ఎన్నో కలలు కన్న కుటుంబం.. ఒక్కసారిగా విషాదంలో మునిగిపోయింది. సమస్యలు ఎంత పెద్దవైనా, ఒక మనిషి ప్రాణం కంటే అవి పెద్దవి కావని ఈ ఘటన మరోసారి గుర్తుచేస్తోంది.