తెలంగాణ బీజేపీ పదాధికారుల పనితీరుపై మధుకర్, అభయ్ పాటిల్ అసంతృప్తి

హైదరాబాద్ అక్టోబర్‌ 05:

తెలంగాణ రాష్ట్ర బీజేపీ పదాధికారుల పనితీరుపై పార్టీ రాష్ట్ర ఇన్‌చార్జ్‌లు మధుకర్, అభయ్ పాటిల్ తీవ్ర అసంతృప్తి వ్యక్తం చేశారు. రాష్ట్ర పదాధికారుల సమావేశంలో నేతల పనితీరుపై వారు తీవ్రంగా ప్రశ్నించినట్లు సమాచారం.

“ఇలా ఉంటే తెలంగాణలో అధికారంలోకి ఎలా వస్తాం?” అంటూ నేతలను నిలదీసినట్లు తెలుస్తోంది. పార్టీలో క్రియాశీల సభ్యత్వం లేని కొందరు కూడా రాష్ట్ర స్థాయి బాధ్యతల్లో కొనసాగుతున్నారని వారు అసంతృప్తి వ్యక్తం చేసినట్లు సమాచారం.

మున్సిపల్ ఎన్నికల్లో పార్టీ నిధుల వినియోగంపై అభయ్ పాటిల్ సమీక్ష నిర్వహించారు. నిధుల దుర్వినియోగానికి పాల్పడిన వారిని ఎట్టి పరిస్థితుల్లోనూ వదిలేది లేదని హెచ్చరించారు. అవసరమైతే బాధ్యులపై క్రిమినల్ కేసులు కూడా నమోదు చేస్తామని స్పష్టం చేసినట్లు తెలుస్తోంది.

జిల్లా అధ్యక్షుల పనితీరుపైనా నేతలు ప్రశ్నలు సంధించారు. “జిల్లా అధ్యక్షులను ఏం అడుగుతారు? అందరూ హైదరాబాద్ హెడ్‌క్వార్టర్స్‌లోనే ఉంటే క్షేత్రస్థాయిలో పార్టీ ఎలా బలోపేతం అవుతుంది?” అని ప్రశ్నించినట్లు సమాచారం. ముగ్గురు మినహా మిగతా నేతలంతా హైదరాబాద్‌లోనే ఉంటున్నారని పేర్కొన్నట్లు తెలుస్తోంది.

ఇకపై మేనేజ్ చేసుకుని పదవులు తెచ్చుకోవడం కుదరదని, పార్టీ కోసం క్షేత్రస్థాయిలో పనిచేసే వారికే ప్రాధాన్యం ఉంటుందని మధుకర్, అభయ్ పాటిల్ స్పష్టం చేసినట్లు సమాచారం. రాష్ట్ర నేతల పర్యటనలను ఇకపై తామే నేరుగా పర్యవేక్షిస్తామని, నాయకులు జిల్లాలు, నియోజకవర్గాల్లో విస్తృతంగా పర్యటించి పార్టీని ప్రజల్లోకి తీసుకెళ్లాలని సూచించినట్లు తెలుస్తోంది.