చేనేత కార్మికులకు షరతులు లేకుండా పెన్షన్లు మంజూరు చేయాలి

గొల్లపల్లి, ఆగస్టు 31 (ప్రజా మంటలు):

రాష్ట్రంలోని 50 సంవత్సరాలు పైబడిన చేనేత కార్మికులకు ప్రభుత్వం అందించే చేయూత పెన్షన్లను ఎలాంటి కఠిన నిబంధనలు, షరతులు లేకుండా సరళతరం చేసి వెంటనే మంజూరు చేయాలని తెలంగాణ చేనేత ఐక్యవేదిక జగిత్యాల జిల్లా ప్రధాన కార్యదర్శి అంకం భూమయ్య ప్రభుత్వాన్ని డిమాండ్ చేశారు.

ఈ సందర్భంగా ఆయన మాట్లాడుతూ క్షేత్రస్థాయిలో అర్హులైన చేనేత కార్మికులు పెన్షన్ పథకానికి దరఖాస్తు చేసుకునే విధానాన్ని ప్రభుత్వం సులభతరం చేయాల్సిన అవసరం ఉందన్నారు. ప్రస్తుతం ఉన్న నిబంధనల కారణంగా అనేక మంది అర్హులైన నేతన్నలు పథకానికి దూరమయ్యే పరిస్థితి నెలకొందని ఆవేదన వ్యక్తం చేశారు.

ఇటీవల వరుస సెలవులు రావడంతో పెన్షన్ కోసం దరఖాస్తు చేసుకునే ప్రక్రియలో చేనేత కార్మికులు తీవ్ర ఇబ్బందులు ఎదుర్కొన్నారని తెలిపారు. ఈ నేపథ్యంలో ప్రభుత్వం దరఖాస్తుల గడువును మరింత పొడిగించి, అర్హత ఉన్న ప్రతి చేనేత కార్మికుడికి చేయూత పథకం ద్వారా పెన్షన్ అందేలా చర్యలు తీసుకోవాలని కోరారు.

is చేనేత రంగం అనేక ఆర్థిక సమస్యలను ఎదుర్కొంటోందని, వృత్తిపై ఆధారపడి జీవిస్తున్న కుటుంబాల పరిస్థితి మరింత దయనీయంగా మారుతోందని భూమయ్య పేర్కొన్నారు. వృద్ధాప్యంలో ఉన్న చేనేత కార్మికులకు పెన్షన్ ఎంతో కీలకమైన ఆర్థిక భరోసా అని అన్నారు. ప్రభుత్వం వెంటనే స్పందించి ఎలాంటి కఠిన షరతులు లేకుండా అర్హులైన చేనేత కార్మికులందరికీ పెన్షన్లు మంజూరు చేయాలని ఆయన విజ్ఞప్తి చేశారు.