యాదవులను కురుమ కులంలో కలపవద్దు

సికింద్రాబాద్,ఆగస్ట్ 22 (ప్రజామంటలు):

యాదవ సామాజిక వర్గాన్ని కురుమ కులంలో కలపడానికి కుట్రలు జరుగుతున్నాయని, దీనిని తీవ్రంగా ఖండిస్తున్నామని తెలంగాణ రాష్ట్ర కురుమ సంఘం, కురుమ జేఏసీ నాయకులు స్పష్టం చేశారు. ఈ మేరకు శనివారం తెలంగాణ రాష్ట్ర బీసీ సంక్షేమ కమిషన్ చైర్మన్ జి. నిరంజన్, సభ్యులు ఆర్. జయప్రకాష్, టి. సుదర్శన్‌లను కలిసి వినతిపత్రం అందజేశారు. బిసి-బి జాబితాలోని సీరియల్ నెంబర్ 11లో ఉన్న కురుమ (గొర్రె కాపర్లు) కులంలో బిసి-డి సీరియల్ నెంబర్ 33లో ఉన్న యాదవ (పశుపాలకులు) సామాజిక వర్గాన్ని కలపాలని ఆలేరు కాంగ్రెస్ ఎమ్మెల్యే బీర్ల ఐలన్న బీసీ సంక్షేమ శాఖకు లేఖ రాయడాన్ని కురుమ సంఘాల నేతలు తీవ్రంగా తప్పుబట్టారు.
రెండు వేర్వేరు సంస్కృతులు, జీవన విధానాలు కలిగిన సామాజిక వర్గాలను ఒకే కులంలో కలపడం వల్ల కురుమల హక్కులకు తీవ్ర విఘాతం కలుగుతుందని ఆందోళన వ్యక్తం చేశారు. యాదవులను కురుమ కులంలో కలిపే ప్రతిపాదనను వెంటనే ఉపసంహరించుకోవాలని కమిషన్‌ను కోరారు. ఈ కార్యక్రమంలో తెలంగాణ రాష్ట్ర కురుమ సంఘం వర్కింగ్ ప్రెసిడెంట్ వన్నాడి రమేష్ కురుమ, ఇంటలెక్చువల్స్ ఫోరం నాయకుడు హెచ్. గురునాథ్ కురుమ, సీనియర్ కాంగ్రెస్ నాయకులు సనత్ నగర్ నియోజకవర్గ ఇన్ చార్జ్ మంత్రి సునీల్ కురుమ, బీసీ నాయకుడు గనం నరసింహ కురుమ, కాంగ్రెస్ సీనియర్ నేత దేవుని లక్ష్మణ్ కురుమ, సికింద్రాబాద్ కాంగ్రెస్ నాయకులు దినేష్ కురుమ, నటరాజ్ కురుమ, ఎర్ర సునీల్ కురుమలతో పాటు పెద్ద సంఖ్యలో కురుమ కుల బాంధవులు పాల్గొన్నారు.
–