కరీంనగర్ సహకార అర్బన్ బ్యాంక్ ఎన్నికలకు కాంగ్రెస్ పార్టీ పక్షాన పానెల్ ను ప్రకటించలేదు

తమకే మంత్రుల అండదండ ఉందంటూ నేతలు చేస్తున్న ప్రచారాన్ని నమ్మవద్దు

అర్బన్ బ్యాంక్ ఎన్నికల్లో కాంగ్రెస్ పార్టీ జెండా ఎగరవేస్తాం.. బ్యాంకు అభివృద్ధికి ప్రభుత్వం పక్షాన సహకరిస్తాం

కరీంనగర్ అక్టోబర్ 27 (ప్రజా మంటలు):

జిల్లాకు చెందిన రాష్ట్ర రవాణా బీసీ సంక్షేమ శాఖ మంత్రి పొన్నం ప్రభాకర్, ఇన్చార్జి మంత్రిగా హైదరాబాద్ జూబ్లీహిల్స్ ఉప ఎన్నిక ప్రచారంలో  ఉండగా, జిల్లాకు చెందిన ఎమ్మెల్యే మేడిపల్లి సత్యం, సుడా చైర్మన్, నగర కాంగ్రెస్ అధ్యక్షులు కోమటిరెడ్డి నరేందర్ రెడ్డి జిల్లా గ్రంథాలయ సంస్థ చైర్మన్ సత్తు మల్లేశంతో పాటు ఇతర ముఖ్య నేతలతో జరిపిన చర్చల అనంతరం తీసుకున్న నిర్ణయం మేరకు కరీంనగర్ అర్బన్ బ్యాంకు ఎన్నికలకు సంబంధించి కాంగ్రెస్ పార్టీ పక్షాన ఎలాంటి ప్యానల్ ను  ప్రకటించలేదని జిల్లా అధ్యక్షులు కవ్వంపల్లి సత్యనారాయణ స్పష్టంగా ప్రకటన విడుదల చేశారు.

ఇటీవల కొన్ని దినపత్రికల్లో ఆ ప్యానల్ సభ్యులకే  మంత్రుల అండ, దండ ఉందని అర్బన్ బ్యాంకులో చైర్మన్ సీటును కైవసం చేసుకోబోయేది వారే అని వస్తున్న ప్రకటనలను జిల్లాకు చెందిన కాంగ్రెస్ పార్టీ శ్రేణులు నాయకులు కార్యకర్తలు, అర్బన్ బ్యాంకు ఓటర్లు నమ్మవద్దని ఇది పూర్తిగా అసత్య ప్రచారమని జిల్లా కాంగ్రెస్ ప్రకటించింది.

అర్బన్ బ్యాంకు ఎన్నికల బరిలో నిలిచిన వారిలో ఎక్కువమంది కాంగ్రెస్ పార్టీ వారే ఉన్నందున, కచ్చితంగా కాంగ్రెస్ పార్టీకి చెందిన సభ్యులు మాత్రమే పాలకవర్గాన్ని ఏర్పాటు చేయుటకు అవకాశాలు ఉన్నాయని ఈ ప్రకటనలో ధీమా వ్యక్తం చేశారు.

అర్బన్ బ్యాంకు చరిత్రలో ఎక్కువ కాలం పాలకవర్గాన్ని నడిపించిన ఘనత కాంగ్రెస్ పార్టీకే దక్కిందని, ఈసారి అర్బన్ బ్యాంకు ఎన్నికల్లో విజయం సాధించేది కాంగ్రెస్ పార్టీ మాత్రమేనని, అర్బన్ బ్యాంకు వినియోగదారులు, ఖాతాదారుల సలహాలు, సూచనలు, అభిప్రాయాలు తీసుకోవడంతోపాటు త్వరలో కొలువు దీరనున్న నూతన అర్బన్ బ్యాంకు పాలకవర్గానికి, బ్యాంకు అభివృద్ధికి కాంగ్రెస్ పార్టీ తోడ్పాటు అందిస్తుందని, కార్పోరేట్ స్థాయిలో బ్యాంకును ఆధునీకరించడం,  సేవలు అందించడానికి ప్రభుత్వం కృషి చేస్తుందని మానకొండూరు ఎమ్మెల్యే, కరీంనగర్ జిల్లా కాంగ్రెస్ పార్టీ అధ్యక్షులు డా.కవ్వంపల్లి సత్యనారాయణ,తెలిపారు.