అంబారి పేట స్వయంభు వెంకటేశ్వర స్వామి ఉత్తర ద్వార దర్శనానికి సర్వం సిద్ధం

అంబారి పేట స్వయంభు వెంకటేశ్వర స్వామి ఉత్తర ద్వార దర్శనానికి సర్వం సిద్ధం

జగిత్యాల రూరల్ జనవరి 9 (ప్రజా మంటలు):

వైకుంఠ ఏకాదశి ఉత్తర ద్వార దర్శనానికి అంబర్పేట కొండపై స్వయంభుగా వెలసిన  శ్రీ వెంకటేశ్వర స్వామి ఆలయాన్ని సంప్రదాయబద్ధంగా అలంకరించారు. అంతేకాకుండా విద్యుత్ దీపాలు ఏర్పాటు చేశారు. భక్తుల సౌకర్యార్థం చలువ పందిళ్లు ఏర్పాటు చేశారు. అదేవిధంగా శుక్రవారం వైకుంఠ ఏకాదశి స్వామి వారి దర్శనానికి వచ్చే భక్తుల కోసం ఆర్టీసీ వారు జగిత్యాల జిల్లా కేంద్రంలోని పాత బస్టాండు, కొత్త బస్టాండు, మంచినీళ్ల భావి మీదుగా ప్రత్యేక బస్సులు నడపనున్నారు. ఉత్తర ద్వార దర్శనానికి భక్తులు కుటుంబ సమేతంగా బంధుమిత్రులతో కలిసి అధిక సంఖ్యలో పాల్గొని ఉత్తర ద్వారం గుండా స్వామి వారిని దర్శించుకోవాలని మాజీ సర్పంచ్ గంగాధర్ తెలిపారు .ఇదిలా ఉండగా మాజీ జెడ్పిటిసి మాకునూరు జితేందర్ రావు ఆలయ అభివృద్ధి గూర్చి రాబోయే రోజుల్లో భక్తుల కోసం చేయబోయే ఏర్పాట్ల గూర్చి అభివృద్ధి పనులను వివరిస్తూ ప్రతి ఏటా ఫిబ్రవరి మాసంలో స్వామివారి కళ్యాణం నిర్వహించబడునని తెలిపారు.

ఇటీవలే కొత్తగా గిరిప్రదక్షిణకై రోడ్డు ఏర్పాటు చేసినట్లు తెలిపారు .ఆలయ ఆర్థిక వనరులకై ఆలయ ఆవరణలో గుట్ట కింది భాగంలో ఆలయ  నిర్వహణ ఖర్చులకు ఉపయోగపడేలా దుకాణాల సముదాయం ఏర్పాటు చేస్తున్నట్లు తెలిపారు. దాతల సహకారంతో గ్రామ యువకులు, గ్రామస్తుల సహకారంతో ఆలయం ప్రతి ఏటా నూతన సౌకర్యాలతో రూపుదిద్దుకుంటుందని మీడియాకు తెలిపారు.

తిరుమల తిరుపతి దేవస్థానం వారు భజన మండపం కోసం ఇటీవల 10 లక్షల రూపాయలు నిధులు ఇవ్వగా మహామంటపాన్ని దక్షిణం వైపు నూతన నిర్మాణం చేపడుతున్నట్లు పేర్కొన్నారు.