సింగరేణి ప్రాంత వనరులు, ప్రజలను దోచుకుంటున్న కాంగ్రెస్ నేతలు: కవిత 

ప్రత్యామ్నాయ రాజకీయ శక్తిగా తెలంగాణ రక్షణ సేన ఎదుగుతుంది - కల్వకుంట్ల కవిత 

పెద్దపల్లి, జూన్ 19 (ప్రజా మంటలు):

తెలంగాణ రక్షణ సేన చీఫ్ కల్వకుంట్ల కవిత కాంగ్రెస్ ప్రభుత్వంపై, ముఖ్యంగా ఉప ముఖ్యమంత్రి భట్టి విక్రమార్క, మంత్రి శ్రీధర్ బాబు, ఎమ్మెల్యే ప్రేమ్‌సాగర్ రావుపై తీవ్ర విమర్శలు చేశారు. సింగరేణి ప్రాంత ప్రజలు, కార్మికులు, రైతుల సమస్యలను పక్కనబెట్టి ఇసుక, మట్టి, బూడిద దందాల్లో నిమగ్నమయ్యారని ఆరోపించారు. ఈ ముగ్గురు "బందిపోటు దొంగల్లా వ్యవహరిస్తూ ప్రజల సంపదను దోచుకుంటున్నారని" మండిపడ్డారు.
గత నాలుగు రోజులుగా ‘బాయిబాట’ కార్యక్రమంలో భాగంగా చెన్నూర్, బెల్లంపల్లి, మంచిర్యాల, ఆసిఫాబాద్, కాగజ్‌నగర్, రామగుండం, మంథని ప్రాంతాల్లోని బొగ్గు గనులను సందర్శించి కార్మికులు, రైతులు, ప్రజల సమస్యలను తెలుసుకున్నామని కవిత తెలిపారు. శనివారం భూపాలపల్లి బొగ్గుగనిని సందర్శించనున్నట్లు చెప్పారు.
రాష్ట్రంలో రైతుల పరిస్థితి అత్యంత దయనీయంగా మారిందని, కల్లాల వద్దే వడ్లు కొనుగోలు కాక రైతులు తీవ్ర మనోవేదనకు గురవుతున్నారని పేర్కొన్నారు. మిల్లర్లు ధాన్యం కొనుగోలు చేయకపోవడంతో కొందరు రైతులు ఆత్మహత్యాయత్నాలకు పాల్పడుతున్నారని ఆవేదన వ్యక్తం చేశారు. రైతు భరోసా అమలు, యూరియా సరఫరా విషయంలో ప్రభుత్వం పూర్తిగా విఫలమైందని ఆరోపించారు. యూరియా యాప్‌ను వెంటనే రద్దు చేయాలని డిమాండ్ చేశారు.
సింగరేణిలో డిపెండెంట్ ఉద్యోగాల భర్తీని కూడా ప్రభుత్వం రాజకీయ సభలకు వేదికగా మార్చిందని, రెండు వేల ఉద్యోగాలు ఇవ్వాల్సి ఉండగా విడతల వారీగా కేవలం ఐదు వందల చొప్పున మాత్రమే ఇస్తోందని విమర్శించారు. కార్మికులు, రైతులు, మహిళలు తీవ్ర ఇబ్బందులు ఎదుర్కొంటున్నప్పటికీ ప్రభుత్వం ప్రజా సమస్యలపై దృష్టి పెట్టడం లేదన్నారు.
పత్తిపాక రిజర్వాయర్, ముక్తేశ్వరం ప్రాజెక్టు, మంథని–ముత్తారం లింకేజీ పనులు, ఎస్సారెస్పీ కాలువ మరమ్మతులు వంటి కీలక అంశాలను ప్రభుత్వం నిర్లక్ష్యం చేస్తోందని ఆరోపించారు. భూపాలపల్లి బ్యాక్‌వాటర్ వల్ల నష్టపోయిన రైతులకు పరిహారం చెల్లించాలని, రామగుండంలో కాలుష్య సమస్యపై తక్షణ చర్యలు చేపట్టాలని డిమాండ్ చేశారు.
ఈ ప్రాంతంలో ఉన్న ఎన్టీపీసీ వంటి కేంద్ర సంస్థల కార్మికుల కోసం ఈఎస్ఐ ఆసుపత్రి ఏర్పాటు చేయాలని స్థానిక ఎంపీ కృషి చేయాలని సూచించారు. రాష్ట్రంలో రెండు లక్షల ఉద్యోగాలు ఇస్తామని చెప్పిన కాంగ్రెస్ ప్రభుత్వం ఇప్పటివరకు కేవలం ఐదు వేల కానిస్టేబుల్ ఉద్యోగాలకే పరిమితమైందని, కనీసం 20 వేల ఉద్యోగాలకు నోటిఫికేషన్ విడుదల చేయాలని డిమాండ్ చేశారు.
ప్రజలు ప్రస్తుతం ప్రత్యామ్నాయ రాజకీయ శక్తి కోసం ఎదురు చూస్తున్నారని, తెలంగాణ రక్షణ సేన ఆ ప్రత్యామ్నాయంగా ఎదుగుతుందని కవిత పేర్కొన్నారు. సింగరేణికి మరిన్ని బ్లాక్‌లు కేటాయించి, డిపెండెంట్ ఉద్యోగాలు కల్పించాలని ప్రభుత్వాన్ని కోరారు.