బద్రీనాథ్​ దర్శనానికి వెళ్ళి వస్తూ..అనంతలోకాలకు -పద్మారావునగర్​ స్కందగిరిలో విషాదం

బద్రీనాథ్​ దర్శనానికి వెళ్ళి వస్తూ..అనంతలోకాలకు

-పద్మారావునగర్​ స్కందగిరిలో విషాదం

   *  వర్షాల ధాటికి విరిగి పడిన కొండచరియలు...
   *  ఇద్దరు హైదరాబాద్​ యాత్రికుల దుర్మరణం
   *  డెడ్​ బాడీలు బాగా డ్యామెజ్ ​కావడంతో అక్కడే అంత్యక్రియలు
   *  పద్మారావునగర్​ స్కందగిరిలో విషాదం

సికింద్రాబాద్​ జూలై 07 (ప్రజామంటలు) :

బద్రీనాథ్​ దైవ దర్శనానికి వెళ్ళిన ఇద్దరు హైదరాబాద్​ యాత్రికులు మృత్యువాత పడ్డారు. స్థానికులు, ఫ్యామిలీమెంబర్స్​ కథనం ప్రకారం..గత వారం క్రితం పద్మారావునగర్​ లోని స్కందగిరికి చెందిన దార సత్యనారాయణ (50), నిర్మల్​ షాహీ (36) తో పాటు మరో ఇద్దరు మొత్తం నలుగురు నార్త్​ ఇండియా యాత్రకు బయలు దేరి వెళ్ళారు.

శనివారం ఉదయం ఉత్తరాఖండ్​ లో రెండు బైక్​లను అద్దెకు తీసుకున్న వీరు బద్రీనాథ్​ ఆలయానికి వెళ్ళి దైవ దర్శనం చేసుకొని తిరిగి వస్తుండగా, ఉత్తర ఖండ్​ లోని చమోలీ జిల్లా కర్ణప్రయోగ, గౌచర్​ ల మద్యలో బద్రీనాథ్​ నేషనల్​ హైవేపై కొండచరియలు అకస్మాత్తుగా విరిగి సత్యనారాయణ, నిర్మల్​ షాహీ లు నడుపుతున్న బైక్​ పై పడ్డాయి.

పెద్ద, పెద్ద బండరాళ్ళు పడటంతో వీరిద్దరితో పాటు బైక్​ పూర్తిగా డ్యామేజ్​ అయ్యింది. బండరాళ్ళ తాకిడికి ఇద్దరి శరీరాలు చిధ్రమైపోగా, సమాచారం అందుకున్న పోలీసులు ఘటన స్థలానికి చేరుకొని, శిథిలాల కింద నుంచి వారి డెడ్​ బాడీలను బయటకు తీశారు. ఉత్తరాఖండ్​ వ్యాప్తంగా వర్షాలు కురుస్తుండగా, నదులన్నీ ప్రమాదకర స్థితిలో ప్రవహిస్తున్నాయని సమాచారం.

పోలీసులు హైదరాబాద్​ లోని వారి ఫ్యామిలీ మెంబర్స్​ కు ప్రమాద సమాచారం అందించారు. వెంటనే ఇక్కడి వారి కుటుంబసభ్యులు ఫ్లైట్​ లో ఆదివారం తెల్లవారుజామున  హుటాహుటిన ఢిల్లీకి వెళ్ళి, అక్కడి నుంచి ఉత్తరాఖండ్​ వెళ్ళారు. అయితే ఇద్దరి శరీరాభాగాలు బాగా డ్యామేజ్​ కావడంతో అక్కడి పోలీస్​ అధికారుల సూచన మేరకు అక్కడే అంత్యక్రియలను నిర్వహించినట్లు ఫ్యామిలీ మెంబర్స్​  ఫోన్​ లో తెలిపారు.

ప్రమాదం వార్త తెలియగానే స్కందగిరిలో సత్యనారాయణ నివాసం ఉండే  ప్రియా ఆపార్ట్​ మెంట్​ లో విషాదం నెలకొంది. సత్యనారాయణ ఓ ప్రైవేట్​ జాబ్ చేస్తుండగా, అతడి భార్య హేమ చిన్న కిరాణ కొట్టు నడిపిస్తోంది. వీరికి ఒక కుమారుడు నిఖిల్​ ఉన్నారు. 
–––––––